Ángeles Vázquez visita Copenhague para coñecer proxectos de eficiencia enerxética

A conselleira de Medio Ambiente, Territorio e Vivenda, Ángeles Vázquez, está de viaxe oficial en Copenhague para coñecer os proxectos e iniciativas danesas máis innovadores en canto a eficiencia enerxética.

Vázquez participou este domingo nunha visita guiada ao Centro Danés de Arquitectura (DAC), en Copenhague, unha institución de referencia en toda Europa, "recoñecida polo seu traballo na difusión dos coñecementos sobre a arquitectura, a construción e o desenvolvemento urbano".

Segundo informou o departamento autonómico nun comunicado, este foi o primeiro acto oficial da conselleira da viaxe institucional que desde este domingo e ata o vindeiro martes realizará Vázquez pola capital danesa, onde foi convidada, xunto a outras institucións, pola Embaixada de Dinamarca.

Ata o vindeiro martes, a titular de Territorio visitará diferentes zonas da cidade "para coñecer de primeira man algúns dos proxectos e iniciativas máis relevantes impulsados polas Administracións públicas danesas nos últimos anos en materia de eficiencia enerxética e a partir da aplicación de modelos construtivos sustentables".

Durante a súa visita ao DAC, Vázquez destacou a riqueza do patrimonio arquitectónico de Copenhague, "unha característica que comparte con Galicia". É por este motivo que subliñou a tarefa "fundamental" para dar a coñecer unha disciplina "chave" como é a arquitectura. Ao fío disto, a conselleira lembrou que a Xunta impulsou a primeira Lei de Arquitectura de Galicia, actualmente en información pública e que definirá esta materia como un ben "de interese xeral".

A conselleira de Medio Ambiente, Territorio e Vivenda, Ángeles Vázquez, no Parlamento galego | Fonte: Xunta de Galicia.