A Xunta aspira a chegar a 16.000 familias e calcula que fan falta 17.000 empregos con obras de eficiencia enerxética
Con orzamentos para mobilizar 360 millóns de euros no horizonte de 2026
Por Europa Press / Redacción | SANTIAGO DE COMPOSTELA | 26/11/2021 | Actualizada ás 13:21
A Xunta persegue chegar a 16.000 familias e calcula que Galicia necesitará uns 17.000 postos de traballo en relación con obras de eficiencia enerxética os próximos anos. En concreto, a conselleira de Medio Ambiente, Ángeles Vázquez, apuntou a orzamentos co horizonte posto en 2026 e que teñen que mobilizar polo menos 360 millóns de euros, para o que a comunidade deberá xustificalos e certificalos "en tempo e forma".
Relacionados con actuacións para xerar "fogares máis cálidos durante o inverno e máis frescos durante o verán", a conselleira destacou que isto "só se consegue cunha boa envolvente, unha boa carpintaría e tendo eficiencia enerxética".
"Perseguimos chegar a 16.000 familias con estes orzamentos e tamén seguir dinamizando o sector de maneira que haxa máis postos de traballo e manteñamos os existentes", sinalou, tras reunirse coa Federación Galega da Construción.
A estimación que fai a Xunta, indicou, sitúa nuns 17.000 postos de traballo os que vai necesitar Galicia "para seguir o ritmo que está a marcar Europa, que ten un item para estes orzamentos que é o ano 2026".
Todo iso "ten que ir avalado e amparado pola eficiencia enerxética", remarcou. Así, resaltou que implicará "menor consumo e optar por enerxías limpas fundamentais, que van supor unha diminución dunhas 65.000 toneladas de emisións de CO2" en caso de lograrse a meta de mobilizar polo menos 360 millóns de euros.
CONSTRUTORES
Pola súa banda, Diego Vázquez Reino, da federación, dixo tras o encontro que quedaron emprazados "a seguir traballando de maneira máis técnica" coa consellería.
Ante o "reto" do desabastecemento de materias primas e a falta de traballadores cualificados, mostrou o seu compromiso "firme" en axilizar e informar aos seus asociados "de todas estas liñas". "Galicia vai mostrar a potencialidade que ten", asegurou.
