Por Galicia Confidencial | Compostela | 09/12/2021 | Actualizada ás 21:35
O Sindicato de Traballadoras e Traballadores do Ensino Público (STEG) vén de denunciar que a Consellería de Educación non está a cumprir co prometido en setembro, momento no cal aseguraban que as substitucións do persoal interino e substituto se cubrirían cunha antelación máxima de tres días lectivos. Así, o sindicato censura que a pesar de que os chamamentos
para cubrir ao persoal docente fanse de forma ordinaria os martes e os venres, "nin o venres pasado nin este martes se fixeron chamamentos para cubrir as vacantes, agás as de Educación Infantil".
"No peor momento da pandemia deste curso", afirman, "a Consellería deixa aos centros educativos sen profesionais, negándose dun xeito velado a cubrir as vacantes". Dende o STEG consideran que Educación busca busca un aforro "que dista moito da promesa do conselleiro de que o ensino galego contaría este curso con todos os recursos necesarios".
O STEG expresa o seu rexeitamento ao modo de proceder da Consellería, que "deixa aos centros educativos en precario, e ao alumnado desatendido", amosando "unha vez máis o seu desinterese por manter unha educación pública de calidade e unha falta de respecto absoluta" cara aos seus profesionais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.