O PP pon en apuros a Miguel Anxo Fernández Lores

O grupo municipal do Partido Popular de Pontevedra rexistrou unha iniciativa para que unha nova rúa da cidade leve o nome do expresidente do Goberno recentemente falecido Adolfo Suárez.

Os populares presentaron este venres no Concello o escrito no que o piden e argumentan a iniciativa que anunciou a pasada semana, ao finalizar o loito oficial polo falecemento deste político. O documento reflicte a intención do PP de conseguir un consenso entre o tres grupos políticos con representación na corporación municipal e que a proposta salga adiante por unanimidade, para o que insta o alcalde, o nacionalista Miguel Anxo Fernández Lores, a que convoque unha sesión da comisión permanente de Cultura. Con todo, a iniciativa pode ser rexeitada polo BNG en función do aprobado pola súa Executiva Nacional recentemente.

"Homenaxe" a Adolfo Suárez

"o noso concello pode render unha merecida homenaxe á figura do presidente Adolfo Suárez. Sería un xesto de recoñecemento permanente, para honrar no presente e lembrar no futuro a súa figura histórica", argumetna o portavoz do PP, Jacobo Moreira, nun comunicado. 

Así, destaca que Adolfo Suárez foi o primeiro presidente da democracia, "desempeñou un papel fundamental" na recente historia de España, posto que a súa talla moral e o seu sentido de Estado "foron claves para o éxito da Transición".

O grupo popular resalta ademais que o traballo de Suárez foi "esencial para culminar un dos maiores logros conseguidos por España como país, a Constitución de 1978".

Propoñen que a rúa que leve o seu nome sexa a resultante das obras de desdobramento da Avenida de Vigo. "Sen dúbida, será unha estrada relevante de acceso á cidade e mesmo o goberno local cualificou os traballos como a obra máis ambiciosa da década, polo que nos parece a ocasión oportuna para que esta nova vía leve o nome do presidente Adolfo Suárez", conclúe a nota.

O BNG rexeita as declaracións institucionais

Con todo, o proxecto pode ser paralizado polo BNG. E é que, logo da morte do ex presidente do Goberno español, Adolfo Suárez, e o anuncio de numerosos actos conmemorativos, a dirección do BNG remitiu aos seus cargos institucionais unha circular na que lles recomendaba non asinar declaracións institucionais ao respecto. Unha acción que pode estendese agora a outras actividades, como nomes a rúas ou vías.

Na súa declaración, a Executiva apuntaba que o BNG "non se prestará a converter este falecemento nun reforzo positivo dun proceso de transición -avalado pola UCD, AP, PSOE e PCE- que o nacionalismo galego leva décadas a combater e que supuxo a ausencia dunha verdadeira ruptura co réxime anterior" nin "asinará declaracións institucionais, nin apoiará co seu voto o intento de converter este proceso nun referendo positivo sobre a convivencia no Estado español, un estado que nos nega e unha Constitución que non recoñece os nosos dereitos nacionais".

Con todo, esta recomendación non foi seguida por quen pasa por ser o principal cargo institucional que ten, agora, o BNG, o vicepresidente da Deputación de Lugo, Antonio Veiga Outeiro, que, xunto co seu grupo aprobou unha declaración institucional con motivo do falecemento de Adolfo Suárez.