*A Xunta defende que remitiu á Xustiza as supostas irregularidades en Agader "cando se detectaron"

O conselleiro de Medio Rural, José Gónzález, defende que a Xunta remitiu á Xustiza "cando se detectaron" as supostas irregularidades na xestión de varios expedientes por parte de Javier Blanco Carballal, ex subdirector xeral da Axencia Galega de Desenvolvemento Rural (Agader).

No pleno do Parlamento, a deputada socialista Carmen Rodríguez Dacosta preguntou por este caso que afecta, segundo explica, a tres subvencións de Agader ao Concello da Pobra do Brollón que suman uns 290.000 euros, no tocante a cuestións como un proxecto arqueolóxico, obras en camiños e un albergue. Remarca que cando os fondos non chegaron, o propio concello abriu uns recursos contencioso-administrativo na xustiza.

Respecto diso, sinala que Javier Blanco tamén foi director do Banco de Terras e portavoz do PP en Lalín, mentres ten en propiedade unha consultora privada.

Así, Rodríguez Dacosta acusa a Consellería de Medio Rural de "falta de transparencia", mentres pregunta ao conselleiro se Agader é un "mero chiringuito de repartición de fondos con criterios partidistas para os seus amigos". Indica que a Xunta deu a praza de subdirector de Agader ao dirixente do PP no Barco de Valdeorras, Moisés Blanco, e fichou de asesor ao exalcalde popular en Fisterra.

En resposta, José González dixo que a Xunta está a "total disposición da Xustiza" para "esclarecer" o acontecido nestes expedientes. Igualmente, remarca que se reestruturou este organismo.

Sostén que ao detectarse "varias incidencias vinculadas a unha serie de expedientes", o primeiro que se fixo foi abrir un procedemento de actuacións previas "de carácter reservado", tras o cal trasladáronse os expedientes á asesoría xurídica de Xunta, de cuxa análise se decidiu pór en coñecemento da Fiscalía de área de Santiago. Así, da instrución encárgase o Xulgado Número 2 de Compostela.

Ademais, o conselleiro explica que "se acordou suspender a execución dos actos incluídos no procedemento".