A comisión de financiamento contará coa comparecencia do conselleiro de Facenda, Elena Muñoz e Leiceaga
A previsión é que o plan de traballo se desenvolva en tres fases, empezando pola solicitude e achega de documentación.
Por E.P. | SANTIAGO DE COMPOSTELA | 23/12/2021 | Actualizada ás 15:39
A Comisión non permanente especial de estudo sobre a reforma do sistema de financiamento aprobou por unanimidade este xoves o plan de traballo deste órgano, que inclúe a solicitude de 21 documentos e informes a distintas administracións e entidades públicas e privadas, así como a comparecencia de once expertos e cargos vinculados co ámbito financeiro, entre eles o conselleiro de Facenda, Miguel Corgos.
A previsión é que o plan de traballo se desenvolva en tres fases, empezando pola solicitude e achega de documentación, co rogo de que sexa incorporada á Comisión en canto sexa posible.
A Comisión analizará, entre outros documentos, estudos realizados por Santiago Lago, representante da Comunidade no Comité de Expertos para a reforma do sistema de financiamento autonómico e catedrático de Economía Aplicada na Universidade de Vigo, e doutros economistas, do mesmo xeito que outros informes previos de expertos do ámbito universitario ou das administracións.
Tamén se solicitan informes das consellerías máis ligadas ás áreas de sanidade, educación e servizos sociais en relación aos custos dos servizos prestados, e documentación que poida remitir a Xunta ao Consello de Política Fiscal e Financeira (CPFF), incluída a valoración que envíe da proposta de revisión da poboación axustada elaborada polo grupo de traballo estatal.
En canto ás comparecencias, que se prevén axilizar --na Cámara, segundo fontes consultadas por Europa Press, solicitarase habilitar a tal fin a semana despois de Reis--, e que suman un total de once citados, empezando polo conselleiro de Facenda, Miguel Corgos, e o economista e representante da Comunidade no comité de expertos estatal, Santiago Lago.
Tamén están chamados Ángel de la Fuente Moreno, profesor de Economía Pública da Universidade Autónoma de Barcelona; Roberto Fernández-Llera, profesor titular de Facenda Pública da Universidade de Oviedo; e Diego Martínez, do Departamento de Economía, Métodos Cuantitativos e Historia Económica da Universidade Pablo de Olavide.
Regresará á Cámara autonómica a senadora popular Elena Muñoz, ex interventora xeral da Comunidade e ex conselleira de Facenda, así como outros expertos nos ámbitos económicos e financeiros como Xosé Díaz, Alberto Turnes, Francisco J. Constenla, María Cadaval, e Xoaquín Fernández Leiceaga, senador socialista e profesor de Economía aplicada na Universidade de Santiago de Compostela.
