Soben os ingresados por Covid en todas as áreas sanitarias e Galicia roza xa os 50.000 casos activos
Os novos contaxios baixan dos 3.000 por primeira vez dende hai unha semana. Realizáronse 4.700 PCR menos que as feitas na xornada anterior.
Por Europa Press / Redacción | SANTIAGO DE COMPOSTELA | 03/01/2022 | Actualizada ás 11:28
Galicia roza os 50.000 casos activos de Covid-19 no inicio desta primeira semana de xaneiro ao contar con 49.988, que supoñen 1.715 máis que a xornada anterior, e rexistra 384 pacientes hospitalizados por este coronavirus, que implican 24 máis; pero os novos contaxios continúan en descenso e sitúanse por baixo dos 3.000, o que non sucedía desde o luns anterior --27 de decembro--. Pola súa banda, a taxa de positividade aumentou a un 28,5 por cento en conxunto da Comunidade galega.
Segundo os datos actualizados na mañá deste luns pola Consellería de Sanidade, con rexistros ata as 18,00 do domingo, aumentan a 53 as persoas ingresadas en UCI pola Covid-19 en Galicia, que supoñen unha máis, e soben a 331 as hospitalizadas noutras unidades --23 máis--, mentres que 49.604 pacientes permanecen en seguimento no seu domicilio.
Por áreas sanitarias, a presión hospitalaria sobe nas sete, coa de Ourense á cabeza, que aínda que mantén seis pacientes Covid en UCI --sen cambios--, rexistra 54 noutras unidades --oito máis--. Polo seu lado, na de Pontevedra e O Salnés soben a 10 o críticos --un máis-- e a 41 os doutras unidades --catro máis--.
Na área de Lugo continúan sete persoas ingresadas en UCI pola Covid e aumentan a 23 as hospitalizadas noutras unidades --catro máis--, mentres que na da Coruña e Cee descenden a oito o críticos --un menos--, pero aumentan a 70 os ingresados noutras unidades --catro máis--.
Pola súa banda, na área de Ferrol mantéñense dous ingresados en UCI, pero soben a 13 os hospitalizados noutras unidades --dúas máis--, mentres que na de Santiago e Barbanza seguen seis en críticos e soben a 48 os doutras unidades --un máis--.
E no caso da de Vigo, que é a que rexistra máis hospitalizados pola Covid-19 en Galicia, aumentan a 14 os pacientes en UCI por este coronavirus --uno máis-- e seguen 82 noutras unidades.
CASE 50.000 CASOS
A Comunidade galega rexistra 49.988 casos activos de Covid-19, a maior cifra alcanzada ata a data, o que supón 1.715 máis que a xornada anterior, ao haber máis novos contaxios (2.899) que altas (1.180), ao que se engaden varios falecementos. O pasado luns --27 de decembro-- había 25.796 infeccións.
O maior aumento de casos activos corresponde á área da Coruña e Cee (+419), seguida da de Lugo (+347), Ourense (+302), Pontevedra e O Salnés (+246), Ferrol (+226), Santiago e Barbanza (+157) e Vigo (+18).
Deste xeito, con máis casos activos segue a área sanitaria de Vigo, con 11.849; seguida da de Santiago e Barbanza, con 9.297; A Coruña e Cee, con 9.065; Pontevedra e O Salnés, con 6.489; Ourense, con 5.421; Lugo, con 4.677; e á cola mantense a de Ferrol, con 3.190.
MENOS CONTAXIOS
Os novos contaxios descenden dos 3.000 por primeira vez desde hai unha semana --desde o luns 27-- ao haber 2.899 novos, que supoñen 633 menos que os 3.532 deste pasado domingo. O xoves, venres e sábado superaron os 5.000.
Desde o inicio desta pandemia Galicia rexistrou 256.719 contaxiados por coronavirus, dos que 57.145 corresponden á área de Vigo; 55.572, á da Coruña; 38.368, á de Santiago; 32.456, á de Ourense; 31.046, á de Pontevedra; 26.397, á de Lugo; e 15.735, á de Ferrol.
Segundo os últimos datos actualizados polo Ministerio de Sanidade o pasado xoves 30 de decembro, a incidencia acumulada a 14 días de Galicia alcanzou os 1.408,09 casos por 100.000 habitantes, fronte aos 1.775,27 de media en España.
Nas últimas 24 horas realizáronse 8.420 PCR, que supoñen unhas 4.700 menos que as feitas o día anterior. Galicia acumula 3.345.019 destas probas efectuadas ata a data. En canto a test de antígenos fixéronse 1.159.669, que implican 6.003 máis que os contabilizados ata o día anterior.
En canto á taxa de positividade en PCR --número de infeccións detectadas cada 100 test--, inicia esta semana cun aumento ao 28,54 por cento, tras descender ao 24,72% o domingo. Por tanto, segue moi por encima do limiar do 5% que fixa a Organización Mundial da Saúde (OMS) para dar por controlada a pandemia.
FALECIDOS E CURADOS
As persoas falecidas diagnosticadas con Covid-19 desde o inicio desta pandemia en Galicia ascenden a 2.770, ao notificar a Consellería de Sanidade este domingo catro vítimas máis.
En concreto, un dos óbitos corresponde ao 29 de decembro e tratouse dun home de 84 anos, falecido no Chuvi. O día 30 morreron outros dous; un de 79 anos e outro de 80 anos, ambos no mesmo centro hospitalario vigués e o 31 perdeu a vida un home de 54 anos, tamén en Vigo. Todos eles, segundo indicou Sanidade, presentaban patoloxías previas.
Pola súa banda, 204.005 persoas diagnosticadas de coronavirus curáronse no conxunto da Comunidade galega desde o comezo desta crise sanitaria, que representan 1.180 máis que as rexistradas ata o día anterior.
