A Xunta volve abrir guerra contra o Coberno co caso do dragado da Ría do Burgo

A conselleira do Mar, Rosa Quintana, trasladou a disposición da Administración autonómica a asinar un convenio co Goberno sobre o pago das indemnizacións aos mariscadores da ría do Burgo, pero concretando o Executivo "a partida orzamentaria para as axudas".

Así o expuxo, en declaracións aos xornalistas, a conselleira tras unha reunión cos afectados e na que lamentou a ausencia de representantes da Administración central que, segundo explicou polo que lle trasladaron os mariscadores, mantivo este luns unha videconferencia con eles.

Nela, apuntou a conselleira, recoñécenlles " que teñen dereito a indemnización". Tamén indicou que se lles trasladou que desde o Executivo central íanse a pór en contacto con ela para asinar un convenio. "Por suposto estamos dispostos a asinar un convenio de colaboración, a condición de que fagan a transferencia do diñeiro que se considere xusto para indemnizar aos traballadores". "É o que mantemos desde o minuto un", dixo, lembrando que, como promotor da obra, a Xunta defendeu que debe ser o Estado quen abone estas axudas.

"A rexeneración da ría é unha obra de interese xeral e as posibles indemnizacións compétenlle á promotora da obra", insistiu, a este respecto, a conselleira, quen lembrou que en 2019 a Xunta expuxo un plan social. A conselleira, que cualificou de "tomadura de pelo" a postura ata agora do Executivo central, mostrou a disposición da Xunta a realizar a tramitación administrativa das axudas, pero se "existe ese convenio no que o Estado faga chegar as indemnizacións", engadiu sobre a partida orzamentaria.

Pola súa banda, o portavoz dos mariscadores, Manuel Baldomir, apoiou a firma dun convenio entre Goberno e Xunta para "solucionar" o pago das indemnizacións a este colectivo polo tempo que permanecerán sen actividade.

Ría do Burgo. MINISTERIO DE TRANSICIÓN ECOLÓXICA | Fonte: Europa Press