A Xunta defende que priorizará os complexos eólicos que destinen o 50% da súa produción á industria
Feijóo trasladou á ministra a "preocupación" polo "impacto" do prezo da enerxía nas industrias electrointensivas e hiperelectrointensivas.
Por Europa Press / Redacción | SANTIAGO DE COMPOSTELA | 13/01/2022 | Actualizada ás 19:22
O presidente da Xunta, Alberto Núñez Feijóo, avanzou este xoves que o Goberno galego priorizará a tramitación de parques eólicos que destinen o 50% da súa produción á industria a través de acordos PPA de prezos fixos da enerxía.
Feijóo fixo este anuncio na súa comparecencia ante a prensa tras reunirse coa ministra para a Transición Ecolóxica e Reto Demográfico, Teresa Ribera, á que trasladou que a Xunta porá en marcha esta medida a través da introdución dun artigo na Lei de Áreas Empresariais.
Nunha intervención na que volveu a trasladar á ministra a "preocupación" polo "impacto" que o prezo da enerxía ten nas industrias electrointensivas e hiperelectrointensivas galegas, sinalou que o "apagado das cubas" de Alcoa é unha decisión de "enorme risco" para España.
"Podémonos quedar sen industria do aluminio no noso país, e por suposto, sen unha das industrias máis importantes que ten ou que tiña Galicia", afirmou Feijóo, que reivindicou a necesidade de "activar esas cubas" sen "esperar ao ano 2024" e asegurou que "o Goberno autonómico ten toda a predisposición para a firma de PPA, prezos fixos da enerxía antes de 2024".
