Os colexios recibirán desde este luns 37.500 test de antíxenos en saliva
O alumnado de 5 a 11 anos realizará a proba nos seus domicilios e se o test dá positivo serán confirmados como caso sen ratificación de PCR.
Por E.P. | SANTIAGO DE COMPOSTELA | 15/01/2022 | Actualizada ás 14:33
Os centros educativos de primaria galegos --tanto públicos como privados-- comezarán a recibir o vindeiro luns 37.500 test de antíxenos en saliva con motivo da volta ás aulas, mentres que outros 17.500 estarán na plataforma do Sergas dispoñibles baixo demanda. Os test realizaranse no domicilio de forma voluntaria e a repartición entre as familias estará supervisado pola persoa coordinadora covid de cada centro.
A Consellería de Sanidade informou desta repartición que, destacou, súmase aos tests que puxo a disposición das familias para que as crianzas de 5 a 11 anos puidesen realizar antes das vacacións de Nadal e á volta. Ademais, nun acto en Bueu, o conselleiro de Educación confirmou tamén a repartición do test de antíxenos que se anunciaron esta semana e que pretenden contribuír a paliar a situación epidemiolóxica, ante a aparición da variante ómicron.
Actualmente, indicou, hai 11 aulas pechadas e unha afectación dun 0,13 por cento, respecto do que Román Rodríguez destacou a certa "normalidade" das aulas no contexto explosivo actual, tendo en conta que aos centros acoden diariamente "case medio millón" de persoas entre escolares, docentes e resto de traballadores.
Este sistema de detección estará dispoñible durante un período estimado correspondente ás dúas primeiras semanas de volta ás aulas, despois das vacacións, que se corresponde co período máximo de incubación de 14 días da covid, aínda que se poderá ampliar (esta dispoñibilidade) en función da evolución da pandemia.
REPARTICIÓN
Dos 55.000 test, 37.500 repartiranse directamente nos centros educativos, proporcionando a cada un deles o número de test equivalente ao 25 por cento do seu alumnado de 5 a 11 anos. Este paquete de test repartirase baixo supervisión do coordinador educovid do centro se aparecen casos esporádicos (de 1 a 4 casos) para poder analizar o alumnado máis próximo aos casos positivos que poidan xurdir e que non signifiquen a clausura da aula. No caso de gromo, intervirá a Dirección Xeral de Saúde Pública.
Sobre esta cuestión, Saúde Pública lembra que o alumnado candidato a este test defínese por unha serie de características marcadas sobre a situación epidemiológia actual. Os 17.500 restantes estarán na plataforma loxística do Sergas e poderán ser fornecidos aos centros que os soliciten, unha vez que xa reste menos dun terzo dos que se recibisen e xustifiquen o correcto uso ata o momento.
PREPARACIÓN E RECOLLIDA
A toma de mostra e a técnica diagnóstica será realizada no domicilio da crianzaa. Antes de comezar a proba, hai que asegurarse de que o neno non coma, beba, cepille os dentes nin comese chicle polo menos 30 minutos antes da recolección da saliva. O hisopo non se deixará caer nin se depositará en ningunha superficie. O neno debe respirar profundamente e logo toser de tres a cinco veces nun pano desechable. A recollida dunha mostra pode durar entre 2 e 5 minutos.
Todas as crianzas que obteñan un resultado positivo na proba de antíxenos de autodiagnóstico serán consideradas directamente como caso confirmado, polo que deberán seguir as medidas de illamento e cumprir as indicacións dos profesionais que se encarguen do seu seguimento clínico.
Co fin de realizar o seguimento e estudo do caso confirmado, a persoa responsable do neno deberá notificar o positivo a Saúde Pública a través do formulario de declaración responsable de autotest positivo.
