Condenado a un ano de cárcere un traballador municipal por agredir ao alcalde de Baños de Molgas

A Audiencia Provincial considérao culpable dun delito de atentado e imponlle unha multa de 1.260 euros

Por Europa Press / Redacción | Ourense | 25/01/2022 | Actualizada ás 19:11

Comparte esta noticia

A Sección Segunda da Audiencia Provincial de Ourense condenou a un operario municipal do Concello de Baños de Molgas a un ano de prisión, así como ao pago dunha multa de 1.260 euros, como autor dun delito de atentado por agredir ao rexedor, Xaime Iglesias (BNG).

Xuízo ao traballador municipal acusado de agredir ao alcalde de Baños de Molgas
Xuízo ao traballador municipal acusado de agredir ao alcalde de Baños de Molgas | Fonte: Europa Press.

Os feitos ocorreron o 3 de novembro de 2020, sobre as 9,45 horas, cando o empregado, xunto con outro compañeiro de traballo, estaban no interior dun bar durante o seu horario laboral. O alcalde, segundo consta nos feitos probados da sentenza, recriminoulle que estivesen alí ao ser precisamente horario de traballo, unha situación que desencadeou a agresión.

Durante a sesión do xuízo celebrada o pasado luns na Audiencia Provincial de Ourense o rexedor municipal esgrimiu que "unicamente tentaba transmitir que, por respecto aos veciños non podían estar no bar en xornada laboral", xa que previamente chamara ao coordinador dos operarios e indicoulle que os empregados terían que estar nunha leira cortando pedras.

Os xuíces destacan que o alcalde cumpría coas súas funcións, xa que foi no exercicio da súa actividade municipal cando lle recriminou ao acusado a súa "ociosa conduta laboral". Así pois, conclúen que "procuraba o correcto funcionamento" do servizo público do que se ocupaba o traballador.

En cambio, o tribunal absolveu ao procesado dos delitos de odio, malos tratos de obra, lesións e ameazas leves.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta