Loito en Galicia polo naufraxio do Villa de Pitanxo

A Xunta decreta tres días de loito oficial polo afundimento e todo o sector da pesca amosa a súa consternación.

Por Europa Press / Redacción | SANTIAGO DE COMPOSTELA | 16/02/2022 | Actualizada ás 13:17

Comparte esta noticia

A Xunta decretou este mércores tres días de loito oficial polo afundimento da Villa de Pitanxo en augas de Terranova e púxose a disposición das familias dos afectados para ofrecerlles "todo tipo de axuda" e acompañalos, en nome de todos os galegos, nestes duros momentos.

O presidente galego, Alberto Núñez Feijóo, foi o encargado de ler unha declaración institucional tras un Consello extraordinario convocado con motivo deste suceso, e no que se declararon oficialmente tres días de loito en toda Galicia. Previamente, o Goberno galego, do mesmo xeito que o resto de institucións e concellos, gardaron un minuto de silencio en memoria das vítimas.

"Galicia é unha gran familia e, cando unha familia é golpeada por un acontecemento tráxico, únese na dor para atopar un consolo que non sempre é fácil", arrinca a declaración institucional lida por Núñez Feijóo por mor de "unha das peores traxedias marítimas" que sufriu Galicia.

Aínda que "pouco se pode facer ante o ocorrido", ante a "morte confirmada" de, polo momento, 10 tripulantes, e a "incerteza" dos 11 desaparecidos, Núñez Feijóo quixo trasladar aos familiares e persoas próximas unha mensaxe de proximidade de "todas as institucións", empezando polo rei Felipe VI, así como a "intensa solidariedade de todos os galegos".

O presidente da Xunta de Galicia, Alberto Núñez Feijóo, garda un  minuto de silencio xunto aos conselleiros, en memoria dos falecidos no naufraxio do buque galego ?Vila de Pitanxo?.. Álvaro Ballesteros - Europa Press
O presidente da Xunta de Galicia, Alberto Núñez Feijóo, garda un minuto de silencio xunto aos conselleiros, en memoria dos falecidos no naufraxio do buque galego ?Vila de Pitanxo?.. Álvaro Ballesteros - Europa Press | Fonte: Europa Press

MINUTO DE SILENCIO

A traxedia uniu este mércores a distintas administracións e institucións en minutos de silencio, convocados de forma simultánea ás 11.00 horas e que chegaron a todos os concellos galegos e institucións que van desde a Xunta ao Parlamento de Galicia.

En Pontevedra, a presidenta provincial, Carmela Silva, gardou un minuto de silencio xunto aos demais participantes nun acto en Vigo e trasladou a solidariedade da institución provincial cos afectados polo naufraxio deste buque con base en Marín e cuxa tripulación residía maioritariamente na comarca pontevedresa do Morrazo.

A presidenta provincial trasladou persoalmente as súas condolencias aos alcaldes e alcaldesas desta comarca e púxose a disposición dos municipios e das familias afectadas. As concentracións repetíronse no resto de deputacións provinciais.

Pola súa banda, o presidente do Parlamento, Miguel Santalices, tamén expresou as súas condolencias aos familiares dos tripulantes, tras presidir un minuto de silencio que congregou a representantes parlamentarios, traballadores e membros do Consello de Contas e o Valedor do Pobo.

LOITO NA PESCA

A Confederación Galega de Confrarías mostrou a súa "tristeza" polo naufraxio do pesqueiro. Así, as bandeiras da entidade permanecerán "abrazadas cun lazo negro en memoria dos mariñeiros". "Hoxe temos o corazón engurrado polos compañeiros do 'Villa de Pitanxo", sinala.

Pola súa banda, o presidente da Federación Nacional de Confrarías e patrón maior de Burela (Lugo), Basilio Otero, puxo á organización a "disposición" das familias e aproveitou para trasladar "o pésame e as condolencias" ás familias e amigos dos falecidos, que levará tamén a Marín, ata onde se desprazou este mércores.

Basilio Otero recoñeceu que se trata do "maior desastre en moitos anos". "É un desastre como en moitos anos que non se lembra. É unha fonda tristeza para o mar, e insisto pómonos ao servizo das familias para o que lles faga falta", comprometeu.

Pola súa banda, as asociacións e empresas da industria do mar tamén quixeron trasladar as súas condolencias e "conmoción" nunha xornada na que suceden as homenaxes e minutos de silencio por toda Galicia.

Así envían o seu pésame nun comunicado conxunto: a Asociación de Empresas depuradoras e Comercializadoras de Moluscos (Agade), Asociación Nacional de Fabricantes de Conservas de Peixes e Mariscos (Anfaco-Cecopesca), a Asociación Empresarial de Acuicultura de España (Apromar) e o Clúster da Acuicultura.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta