Aumentan os casos de violencia de xénero en Pontevedra

A Policía Local de Pontevedra detectou un incremento dos casos de violencia de xénero no concello durante o pasado ano 2021, segundo a Memoria elaborada por este corpo de seguridade e que este venres foi presentada pola concelleira de Protección e Seguridade Cidadá, Eva Vilaverde.

En concreto, no ano 2021 producíronse un total de 32 intervencións por parte da Policía Local en casos referidos ou relacionados coa violencia de xénero. Houbo nove homes detidos e 23 investigados. Deses detidos, oito foron por malos tratos e un por quebrantamento da orde de afastamento. Dos investigados non detidos serían sete por malos tratos e 16 por quebrantamento da orde de afastamento. Do seguimento realizado sobre os agresores, sete deles acabaron en prisión. 

Na actualidade, a Policía Local ten 18 vítimas baixo protección, dúas en risco medio, dez en risco baixo, seis en risco non apreciado. O ano pasado, no 2021, un total de 42 vítimas contaron con protección xudicial prestada polo corpo de protección local.

A idade media dos agresores sitúase, durante o ano pasado, é de 32 anos. Para as vítimas é de 33.