Científicas da USC crean un sistema que avalía os efectos da variación de salinidade nas rías

Investigadoras da USC desenvolveron unha metodoloxía coa que avaliar os efectos da variación da salinidade nas augas das rías, incluíndo por primeira vez impactos positivos asociados a un aumento da concentración, ou efectos negativos asociados a un descenso. O método, aplicado a un estudo de caso na Ría de Arousa, foi desenvolvido pola doctoranda Alba Roibás, as profesoras da USC Almudena Hospido e Anuska Mosquera, así como a investigadora Montserrat Núñez, do Instituto de Investigación e Tecnoloxía Agroalimentarias.

Este sistema amplía as metodoloxías clásicas en análises de ciclo de vida para poder incluír impactos asociados a variacións na concentración de substancias elementais que, tal e como sucede co sal, non poden ser modeladas como un contaminante.

"A pesar de que é dabondo coñecido que os cambios na salinidade afectan os ecosistemas, ata agora, non había modelos ambientais que permitisen medir eses efectos, e as propostas metodolóxicas que existían consideraban o sal desde o enfoque da ecotoxicidade", explican as investigadoras.

Este enfoque implica que, a maiores concentracións de contaminante, maiores efectos. Pero o sal non é un contaminante, senón unha sustancia esencial, polo que esta aproximación non ten en conta os efectos negativos dun descenso na salinidade na auga --como o das rías galegas-- ou os efectos positivos debido a un aumento da concentración --cando a salinidade das rías se recupera tras o evento de baixa salinidade--.

Nos últimos anos, destacan as investigadoras, tiveron lugar "repetidos eventos nos que os peixes e algúns moluscos como o berberecho morreron masiva e repentinamente nas rías galegas, onde a única explicación posible para estes sucesos foi a baixada drástica da salinidade debido á apertura dos encoros".

As actividades antropoxénicas, como a irrigación ou a xestión de presas, "poden chegar a modificar drasticamente a salinidade das augas de transición entre auga doce e salgada, como a das rías galegas". "Ademais, o cambio climático está a intensificar o ciclo da auga no planeta, alterando os patróns das precipitacións e da evaporación, polo que a salinidade da auga está a cambiar", subliñan desde equípoo investigador.

O método foi aplicado a un estudo de caso na Ría de Arousa. | Fonte: Turismo de Galicia