Comesaña ve "arriscado" quitar a máscara en interior e defende reducir as corentenas

O conselleiro de Sanidade, Julio García Comesaña, considera "arriscado" quitar xa as máscaras en interiores, despois de rexistrar Galicia 1.200 novos contaxios, á vez que defende a postura da Xunta de reducir as corentenas a cinco días.

Así o manifestou, a preguntas dos medios en Santiago sobre a postura de Galicia na reunión da Comisión de Saúde Pública prevista para a tarde deste martes. Comesaña resaltou que "os datos seguen baixando" e diminúen as hospitalizacións e os casos activos, pero rexistráronse "1.200 novos positivos" que, matizou, "é un número considerable".

Por iso, apelou á "prudencia" porque "a pandemia aínda está aquí" e "1.200 positivos diarios declarados non é unha cifra menor". Para o titular de Sanidade, iso "require estar preocupados sempre", pero matizou que, con todo, "ese número de positivos tan alto non está a xerar a porcentaxe esperada de pacientes ingresados".

Nese contexto, incidiu en que Galicia expuxera "pasar de 10 a sete" o illamento e máis recentemente trasladou a súa aposta por cinco. "Nós sempre fomos leais co sistema e cos técnicos e expomos a discusión no foro correspondente", afirmou, para afear que este martes pola tarde "vaise abordar este debate entre os técnicos" tras decatarse "polos medios".

"Non nos gusta atopar estas informacións nos medios", reprochou, en relación a manifestacións do presidente do Goberno, Pedro Sánchez, "adiantando que se vai discutir hoxe". "Xa estamos acostumados a que nos medios se vaia por diante dos foros técnicos", apostilou, para abundar que Galicia é "leal ao sistema establecido". "E os nosos técnicos defenderán unha proposta que vai nesa liña; adaptar o manexo dos casos positivos e as corentenas á realidade que estamos a vivir", sentenciou.

Por iso, o conselleiro de Sanidade insistiu en que non vai "caer na tentación de falar fóra do marco técnico", polo que pediu esperar a que a Comisión de Saúde Pública traslade as súas conclusións, á vez que defende que Galicia aposta por "avanzar na normalización destes procesos".

MÁSCARAS DENTRO E FÓRA

Preguntado de novo sobre a posible retirada das máscaras en espazos interiores, Comesaña defendeu a postura de Galicia de "ser un pouco coidadosos" tras deixar de ser obrigatoria en exteriores, para manter a recomendación de usala en aglomeracións como os patios dos colexios. "Seguimos nesa liña de seguir progresivamente dando pasos", sostivo.

Neste sentido, reivindicou a postura do persoal técnico que defende que a máscara no interior é a medida "máis efectiva" na pandemia. "E con 1.200 casos diarios parécenos aínda arriscado falar de quitala", concluíu, para asegurar que "será das últimas" en decaer.

CERTIFICADOS FALSOS

O conselleiro de Sanidade tamén considerou "preocupante" a existencia dunha organización criminal, que foi desarticulada pola Policía Autonómica tras a detención de tres persoas, que facilitaba certificados falsos de PCR e antíxenos tras tres detencións. Comesaña incidiu en que a Consellería "foi a que lanzou a voz de alarma" ante un caso que lles chegou sobre falsificación de probas diagnósticas de Covid-19.

"Parécenos moi grave e por iso o denunciamos cando facer probas en Galicia era tan fácil como ir aos múltiples puntos de probas diagnósticas gratuítas", manifestou. Por iso, o titular de Sanidade subliña que non se entende este modo de actuar, "salvo por motivos espúrios, para poder sacar un rendemento que non ten explicación". "Parécenos preocupante", concluíu.