Por X.M. Fernández | Arzúa | 04/03/2022 | Actualizada ás 21:00
Conta atrás para a Festa do Queixo 2022. O sábado 5 será a unauguración, acto no que ademais de entregarse os premios do concurso de carteis e os de tapas e petiscos, entrégase tamén o de "Arzúan do ano 2021". Como novidade desta edición, o recoñecemento para este último premio será múltipla, outorgarase a diferentes persoas e colectivos.
A título individual, recoñécese a:
Carla Carrón, nadadora campioa de España absoluta en 800 metros libres
Carla Carrón, nadadora do Club Natación Arzúa, pechou o seu recente paso polo campionato de España absoluto de inverno con dúas medallas de ouro, en 400 e 800m libres, a pesares de estar en idade xunior. Becada no Centro Galego de Tecnificación Deportiva, gañou nos 400m libres cun rexistro de 4:07.55, mellor marca galega de 16 anos. Nos 800m quedou tamén campioa absoluta, parando o crono nos 8:25.34. Foi tamén galardoada Mellor nadadora galega nos Premios Galicia Sport 2021.
Diego Quintela, xogador profesional de fútbol sala
Diego actúa como ala-pívot no Pescados Rubén Burela FS e foi convocado pola selección española de fútbol sala. Xa fora pregoeiro nunha edición anterior e este ano é premiado tanto polos seus éxitos deportivos, cunha gran traxectoria, pois xogou tamén no A. Lobelle, FC Barcelona e Palma Futsal, como pola súa recoñecida humildade e traballo constante. Foi nomeado Mellor xogador galego Fútbol Sala nos premios Premios Galicia Sport 2021.
Xosé Zapata, premio Goya á mellor curta de animación
O director, produtor e guionista estivera xa tres veces antes nomeado aos premios Goya, e foi agora cando o acadou con "The Monkey", a curtametraxe que codirixiu xunto con Lorenzo degl’Innocenti e na traballaron un cento de persoas. “The Monkey” e unha coprodución entre España e Portugal, elaborada durante case cinco anos e trata dunha fábula contra o racismo.
A nivel colectivo, o premio vai para:
O persoal sanitario de Arzúa, pola súa capacidade de traballo e esforzo
O Concello decidiu outorgar un premio conxunto a este colectivo. Desexa deste xeito manifestar o seu orgullo dos profesionais sanitarios, e quere así poñer en valor o seu esforzo fronte a COVID-19. Así con este recoñecemento, desexa agradecer publicamente o esforzo particular e colectivo, o sacrificio laboral e persoal, o seu compromiso nestes xa 24 meses de pandemia e de sempre, na atención prestada aos veciños e veciñas de Arzúa.
A residencia San José,
Neste caso polo seu esforzo e labor desenvolvida desde o primeiro momento, nunha situación sanitaria onde non se coñecía a súa repercusión, afectando maiormente a unha parte da poboación especialmente vulnerable.
Os nenos e nenas de Arzúa, exemplo de adaptación á pandemia polo coidado aos nosos maiores
O Concello decidiu outorgar tamén o premio colectivo de “Arzuán do ano” aos nenos e nenas deste concello, xa que foron un exemplo de adaptación e comportamento neste tempo de pandemia tras case dous anos coa COVID-19. É por iso que un/unha representante de cada centro educativo da vila recollerá o premio nos actos de inauguración e pregón
Pódese acceder ao programa completo do evento na páxina web da Festa do Queixo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.