A cúpula do PSdeG asistirá á manifestación do 8M de Santiago
A formación vén de anunciar que recupera os Premios de Igualdade María Vázquez Suárez en favor da igualdade.
Por E.P. | SANTIAGO DE COMPOSTELA | 04/03/2022 | Actualizada ás 14:49
O Partido Socialista de Galicia recuperará este ano os Premios de Igualdade María Vázquez Suárez, concibidos para "visibilizar e recoñecer o traballo de persoas individuais e colectivos a favor da igualdade". Así o avanzou este venres a secretaria de Igualdade do PSdeG, Silvia Fraga, quen presentou a campaña dos socialistas galegos de cara ao 8-M baixo a lema 'Depende de ti' xunto coa secretaria de Participación, Redes Sociais e Comunicación, Paula García; e o secretario xeral das Xuventudes Socialistas de Galicia (XSG), Xurxo Doval.
A responsable socialista puxo o foco na nova edición destes premios, postos en marcha no ano 2015 e que se volven a convocar "na tónica de recuperar a normalidade" tras a diminución da incidencia da pandemia da covid. Silvia Fraga sinalou que estes galardóns, dentro da campaña dos socialistas de cara ao 8-M, constitúen un "gran de area cara á ansiada igualdade real entre homes e mulleres, porque máis feminismo significa maior democracia".
Así mesmo, lembrou que María Vázquez Suárez foi unha mestra durante os anos da república socialista, unha das fundadoras da Agrupación Socialista de Miño en 1933, sindicalista de Fete-UGT, unha "progresista e feminista que morreu asasinada os falanxistas o 19 de agosto de 1936 nunha praia de Miño, despois de ser salvaxemente violada e agredida".
Ademais, destacou que os socialistas galegos participarán nas concentracións convocadas en toda Galicia o próximo 8 de marzo, con especial esforzo na mobilización de Santiago de Compostela, á que asistirán os máximos dirixentes políticos do partido.
