Por E.P. | SANTIAGO DE COMPOSTELA | 04/03/2022 | Actualizada ás 20:14
O conselleiro delegado de Abanca, Francisco Botas, trasladoulle este venres ao presidente da Deputación de Ourense, Manuel Baltar, o compromiso da entidade financeira coa provincia e, specialmente, co medio rural. Así, Botas comprometeuse a non pechar ningunha oficina nos 56 municipios ourensáns nos que é a única entidade.
Baltar agradeceu ao conselleiro delegado de Abanca "a implicación, o compromiso e a resposta" que sempre obtivo o goberno provincial nas propostas de colaboración.
Segundo trasladou a Deputación nunha nota de prensa, no encontro estudaron nova liñas de colaboración que "afiancen e abran a novos ámbitos" a cooperación entre a institución provincial e a entidade financeira.
En concreto, José Manuel Baltar expuxo a implicación de Abanca en proxectos de carácter tecnolóxico como a Mobile Week Ourense 2022, ademais de reforzar o traballo conxunto en proxectos culturais como o Festival de Cinema Internacional de Ourense.
ABANCA, PRIMEIRA ENTIDADE EN OURENSE
A entidade financeira é líder tanto en cota de mercado, cunha cifra do 47%, como en cobertura da poboación, cun nivel do 94%. Así o comunicou Abanca nunha nota de prensa na que se reivindican como "actor clave" na prestación de servizos financeiros en Ourense, con máis de 200.000 clientes.
Abanca conta na provincia con 80 oficinas e está presente en 70 dos 92 concellos ourensáns, en 56 deles como única entidade. Ademais, puxo en valor a súa presenza no rural, xa que o 65% das súas oficinas na provincia están situadas en municipios de menos de 5.000 habitantes.
A entidade bancaria reivindicou tamén o seu vínculo coa provincia de Ourense, que se traduce na colaboración con "numerosas entidades do tecido económico", como "axente impulsor da innovación e o desenvolvemento económico" a través do Centro Abanca Innova Ourense e co Plan Re-Activamos Ourense en colaboración coa Deputación, e tamén co patrocinio de 14 equipos ourensáns en 9 disciplinas deportivas diferentes.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.