Unha decena de centros de FP participarán nunha campaña formativa sobre o uso seguro do tractor
Os centros de formación profesional seleccionados para esta actividade de sensibilización foron os de Arzúa, Coristanco, Boqueixón, Becerreá, Castro de Rei, Monforte de Lemos, Xinzo de Limia, Ribadavia, Ponteareas e Tomiño.
Por E.P. | SANTIAGO DE COMPOSTELA | 12/03/2022 | Actualizada ás 19:39
A Consellería de Emprego e Igualdade, a través do Instituto de Seguridade e Saúde Laboral de Galicia (Issga), iniciou unha serie de actividades formativas en 10 centros de Formación Profesional do catro provincias para concienciar sobre o uso seguro do tractor.
Segundo informou a Xunta nun comunicado, a campaña parte da idea de "sensibilizar desde a base" aos futuros profesionais das explotacións sobre a necesidade de facer un uso seguro desta maquinaria e provela de estruturas de protección e cinto de seguridade.
Os centros de formación profesional seleccionados para esta actividade de sensibilización foron os de Arzúa, Coristanco, Boqueixón, Becerreá, Castro de Rei, Monforte de Lemos, Xinzo de Limia, Ribadavia, Ponteareas e Tomiño.
A Xunta relatou que, segundo datos do Observatorio Estatal de Condicións de Traballo (OECT), o tractor é a causa principal de accidentes laborais na actividade agrícola e gandeira.
A Administración autonómica engadiu que o ano pasado rexistráronse en Galicia 82 accidentes de tractor, dous deles mortais. Neste sentido, sinalou que os sinistros mortais ou con lesións de maior gravidade débense principalmente á ausencia dunha "estrutura de protección" e de cinto de seguridade.
