Anulada polo xulgado a adxudicación do contrato para a xestión da estación de Manzaneda

O Xulgado do Contencioso-administrativo número 1 de Ourense anulou a adxudicación do contrato para a xestión da estación de inverno de Manzaneda á empresa Artabria Turismo. Contra a decisión cabe interpor recurso de apelación.

Nun auto con data do 16 de marzo e do que informou este xoves o Tribunal Superior de Xustiza de Galicia (TSXG), a maxistrada estima o recurso interposto por Grupo Sierra Xestión de Turismo contra a resolución de decembro de 2020 ditada pola sociedade pública Estación de Inverno Manzaneda S.A. (MEISA) pola que se adxudicou o contrato.

A xuíza subliña que a sociedade demandada, que acudiu a un procedemento de adxudicación directa sen publicidade para elixir á empresa, "debeu, cando menos, solicitar tres ofertas, sen que no expediente exista razón algunha que xustifique a imposibilidade de cumprir tal requisito, máxime cando a recorrente puxera de manifesto o seu interese en ser convidada á participación". Iso, segundo apunta, "denota que non existía unha imposibilidade material de solicitar cando menos tres ofertas por inexistencia de operadores no mercado". Por iso, considera que infrinxiu "os principios de concorrencia e non discriminación".

Na sentenza, a maxistrada indica que "non existe ningún acordo ou acto en virtude do cal a sociedade resolvese acudir ao procedemento negociado sen publicidade, senón que existe só o informe da xerencia e, directamente, a invitación a un único operador económico e posterior formalización do contrato".

Por tanto, asegura que se suscita "a falta de competencia, en canto a que o contrato e o propio procedemento negociado sen publicidade non foi autorizado polo órgano de contratación".

A estación de esquí de Manzaneda con neve | Fonte: Meteogalicia