Bizarrap, WOS, Xoel López, Depedro, Alice Wonder, The Parrots e Rojuu, novas confirmacións do PortAmérica

A edición do X aniversario de PortAmérica 2022 xa dispón do cartel por días para celebrar a primeira edición no recinto da Azucreira, en Portas.

Ao cartel veñen de sumar Bizarrap, o maior produtor de trap da actualidade; WOS, o rapero arxentino do momento; e Xoel López, un dos emblemas do festival. As novas confirmacións complétanas grandes referentes nos seus respectivos xéneros musicais como son Depedro, Alice Wonder, Lisandro Aristimuño, Rojuu, The Parrots, Instituto Mexicano del Sonido e Flecha Valona.

PortAmérica 2022, que terá lugar excepcionalmente o primeiro fin de semana de xuño os días 2, 3 e 4, contará por primeira vez coa Carballeira de Caldas de Reis para a súa acampada. Ademais, o festival presenta unha nova programación musical "sesión vermú" que terá lugar as mañás do sábado e do domingo do festival no centro de Caldas na área termal A Tafona. Como en anteriores edicións o festival porá a disposición dos asistentes liñas de autobuses desde seis das principais localidades galegas á venda en portamerica.es.

Música, natureza, gastronomía, tres escenarios, ShowRocking, Mercado de Talentos e acampada daranse cita un ano máis na contorna natural e máxica que é a Comarca de Caldas de Reis.