Regresa o Delas Fest, regresa a arte feminista á rúa

A cuarta edición do festival feminista de arte urbana e contextual Delas Fest, organizado por 7H Cooperativa Cultural na comarca de Compostela, celebrarase entre o 6 e o 21 de xuño de 2022. Para festexar a continuidade do proxecto, que este ano renova o seu formato, e reivindicar os valores a prol da igualdade e de apego ao territorio que o sosteñen, a súa equipa promotora realizou unha intervención artística no local do Fogar do Santiso, en Teo.

A actividade, xurdida da colaboración entre o Delas Fest, o grupo de restauración teense e a empresa catalá Montana Colors, plasma o espírito do festival a través dun mural centrado na visibilización e reivindicación do rol feminino na identidade e benestar da comunidade local. O deseño da peza, protagonizada pola forza e o traballo da muller no rural a través da mirada dunha labrega, realizouse de forma colaborativa a partir da recollida de ideas entre o persoal traballador do Fogar do Santiso, que ofreceu a parede na que se realizou a obra.

UN FESTIVAL ITINERANTE

Segundo explica a organización, a cuarta edición do Delas Fest marcará unha "nova etapa na historia do proxecto", nado en 2019 co obxectivo de contribuír á construción de espazos colectivos de deliberación e experimentación con perspectiva de xénero e combater as desigualdades presentes no sector.

Consolidado como unha das citas de referencia no circuíto galego de arte urbana grazas ao apoio da Deputación da Coruña e dos concellos de Santiago, Ames, Teo e Brión, así como ao patrocinio de Montana Colors, Ibersa-El Mundo del Pintor e Gadis, o festival presenta este 2022 un novidoso formato. Nesta ocasión, as actividades, que volverán estar integradas por catro intervencións artísticas, obradoiros de creación e xuntanzas de convivencia entre veciñanza e creadoras, realizaranse en simultáneo en dous municipios á vez.