Un morto e 49 feridos nos 41 accidentes de tráfico desta fin de semana
Por Europa Press / Redacción | SANTIAGO DE COMPOSTELA | 02/05/2022 | Actualizada ás 12:07
Urxencias Sanitarias de Galicia-061 atendeu a 49 persoas debido a 41 accidentes de tráfico rexistrados o pasado fin de semana na rede viaria galega, das que unha morreu.
Segundo informou o 061, a Central de Coordinación recibiu entre as 15,00 horas do venres, 29 de abril, e as 23,59 horas do domingo 1 de maio 49 chamadas por accidentes de tráfico. O domingo foi o día no que se rexistrou máis sinistros, con 20. Os recursos sanitarios mobilizados polo 061 ascenderon a 49. En concreto, as ambulancias realizaron 47 saídas e os equipos sanitarios de Atención Primaria prestaron asistencia en dous accidentes.
En 37 casos os feridos foron levados aos centros sanitarios correspondentes e en 11 ocasións recibiron atención no lugar do incidente sen necesitar traslado e unha persoa morreu no punto do sinistro.
A proporción de homes atendida ascendeu ao 54 por cento e a de mulleres situouse no 46%. En canto ás idades dos feridos, o 31% dos asistidos tiña entre 20 e 34 anos. Por provincias, a de Pontevedra foi a que rexistrou máis accidentes de tráfico durante os desprazamentos do fin de semana, con 18; seguida da da Coruña, con 15; e Ourense e Lugo, con catro en cada caso.
