A quinta edición do CoruFest, festival pola diversidade e a igualdade, estará dedicada ao mozo asasinado Samuel Luiz
Celebrarase do 17 ao 29 de maio en diferentes espazos da cidade.
Por E.P. | A Coruña | 02/05/2022 | Actualizada ás 16:23
A alcaldesa da Coruña, Inés Rey, presentou a quinta edición do festival CoruFest, que se celebrará do 17 ao 29 de maio en diferentes espazos da cidade. A programación do evento inclúe obras teatrais, exposicións, encontros e obradoiros cuxo obxectivo é a reivindicación da igualdade e a diversidade. Esta edición estará dedicada á memoria de Samuel Luiz, o mozo falecido o pasado 3 de xullo nunha agresión supostamente homófoba no paseo marítimo da Coruña.
"Temos que erradicar a homofobia da nosa sociedade e iniciativas como o CoruFest axudan a loitar contra calquera tipo de discriminación, educando na diversidade", destacou a rexedora durante a rolda de prensa celebrada este luns, na que estiveron presentes os directores do festival, Gustavo do Río e José Leis.
O evento conta con propostas de teatro social, divulgación LGTBI e ficción para todos os públicos. A cita cultural desenvolverase no Teatro Colón, o Teatro Rosalía de Castro e o Fórum Metropolitano.
