Unha moza de Viveiro, entre os falecidos na explosión no Hotel Saratoga da Habana

Unha moza de Viveiro,con identidade C.L. e nada en 1993, é unha das persoas que faleceron pola explosión que provocou o venres graves desfeitas no Hotel Saratoga da Habana (Cuba). Segundo fontes próximas á contorna da nova, permanece en estado grave o noivo dela, un mozo nado en 1992, con identidade C.R.S. e veciño das Pontes. Os dous mozos, que permanecían de vacacións na Habana, residían nas Pontes.

Ambos os dous estaban nas inmediacións do hotel cando se produciu a explosión, segundo fontes diplomáticas. As autoridades cubanas informaron que polo menos 25 persoas morreron pola explosión rexistrada o venres, segundo un novo balance de vítimas actualizado tras a recuperación de varios cadáveres máis durante a madrugada deste sábado.

O presidente cubano, Miguel Díaz-Canel, encomiou o labor dos "heroes" que, nestas "horas terribles", seguiron traballando durante toda a noite na procura de posibles corpos ou sobreviventes atrapados entre os cascallos.

"É moi lamentable o ocorrido, a destrución, sobre todo as perdas de vidas, e tamén as persoas lesionadas, pero unha vez máis quero destacar a rapidez coa que se mobilizaron a poboación e as institucións. Primou a solidariedade", destacou en Twitter.

As autoridades cubanas aseguraron que, por agora, xa se confirmaron 25 vítimas mortais, das cales 22 xa foron identificadas, segundo medios oficiais.

As autoridades locais atribuíron a explosión a un accidente, ocorrido aparentemente durante o traslado de gas desde un camión aparcado xunto ao establecemento hoteleiro. O Saratoga, reaberto en 2005, atópase no caso antigo da Habana.

REPATRIACIÓN

O Goberno central acelerará os trámites de repatriación do corpo de Cristina L., morta na Habana. Así o confirmou o delegado do Goberno en Galicia, José Miñones, quen trasladou o pésame do Executivo estatal á familia e amigos da falecida.

Ademais, Miñones trasladou o apoio do Goberno de España á familia de César R., o noivo da moza.

"Acabo de manter unha conversa co embaixador de España en Cuba para levar un seguimento e detalle de todo o ocorrido e trasladoume que a embaixada se puxo a disposición dos familiares", apuntou o delegado.