Por E.P. | SANTIAGO DE COMPOSTELA | 18/05/2022 | Actualizada ás 18:49
O persoal da biblioteca municipal de Ferrol, situada na praza de España, secunda este mércores, 18 de maio, un paro e unha xornada de folga que motivou que as instalacións permanezan pechadas, sen atención ao público.
Ao mediodía, levaron as súas protestas á praza de Armas, ante o Concello, onde unha das traballadoras simulou contar "un conto" a quen a acompañaba, para representar desta forma "a situación e ver canto conto hai neste Concello", e que ten por título 'A biblioteca que quería ser escoitada', tal e como detallou Estefanía Gómez, funcionaria na biblioteca, delegada do sindicato CSIF.
"Narramos os problemas que tivo a biblioteca ao longo do últimos vinte anos, ver a situación na que estamos e que a pesar de todo non nos recibiron e non recibimos ningunha contestación por parte do goberno", xa que este colectivo o que reclama é que se dote de máis persoal para poder atender cun mínimo de garantías as persoas usuarias.
Gómez reclamou "solucións" e pide axuda "porque isto é insustentable". "Estamos a perder unha chea de usuarios cada día, non sei se se dan conta, pero evidentemente as persoas deixan de vir, porque é inviable", lamenta.
NOVO PARO
En canto á seguinte xornada de protesta, consistente tamén noutra xornada de folga de 24 horas, está convocada para o vindeiro xoves, 26 de maio, que coincidirá co pleno de fin de mes. "A nosa idea é vir para aquí pola tarde e buscar unha orixinalidade máis, porque parece que así é a única forma de que nos escoiten e non se esquezan de nós", indica.
Estefanía Gómez detallou que: "Todo o persoal está a apoiar este paro, incluso as catro persoas que empezaron a traballar hai un mes, de maneira temporal, tamén están aquí e deixan patente que a situación non é algo que nos inventásemos os que estamos alí todo o ano, e veo calquera persoa".
"Non temos pensado desconvocar nada, ata que polo menos senten negociar, xa que nós sempre estivemos abertos a dialogar, démoslles moitas alternativas e aínda non recibimos ningunha resposta", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.