Por Galicia Confidencial | Compostela | 06/06/2022 | Actualizada ás 11:49
Fin de semana caótico nas Urxencias do Centro Hospitalario Universitario de Santiago (CHUS). Así o denuncia a Asociación de pacientes e usuarios do CHUS que di que tanto o sábado coma o domingo acumularonse pacientes nos corredores das instalacións hospitalarioas.
Así, se o sábado, día 4, a situación das urxencias do CHUS era alarmante, o día 5 domingo as condicións do servizo "empeoraron drasticamente" aumentando os pacientes aparcados nos corredores e os que agardaban o ingreso en planta ata os 15 "clasificados como graves".
"A zona de críticos e monitores estaban cheas e 29 pacientes con ingreso asinado ocupaban a sala de observación en espera dunha cama. Nese momento tan só catro a tiñan asignada", indica a entidade nun comunicado. Ademais, suliñan que durante o sábado, pacientes con ingreso asinado agardaron mais de 24 horas polo traslado a planta e critican que 8 padiolas do servizo están pechadas por falta de persoal para atendelas e a xerencia mantén pechadas plantas do Gil Casares.
A Asociación de Pacientes tamén tivo coñecemento a través dunha testemuña de S.M. que un paciente con síndrome de Down que ingresou un venres fai dous semanas, veuse obrigado a permanecer no servizo ata o luns pola mañá da semana seguinte. Ese día ás 18:00 horas ingresou en planta sendo dado de alta o martes. É dicir, pasou o tempo de atención nunca padiola nos servizos de urxencias o que debeu ser atención nunha cama hospitalaria.
"Seguen vulnerando o dereito dos pacientes a intimidade e a dignidade; sáltanse as normas laborais sobre seguridade no traballo colocando aos pacientes nas zonas de evacuación do servizo; empregan as urxencias como un depósito de pacientes en lugar de ser unha zona de atención inmediata de acordo co establecido na Lei de Saúde de Galicia e fan caso omiso dos estándares e recomendacións do Ministerio de Sanidade en relación co funcionamento dos servizos hospitalarios de urxencias", critica.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.