A Deputación de Pontevedra destina 72.000 euros a dez festas de interese turístico
A institución anuncia que porá en marcha dous proxectos que "crearán produto" ao redor da Festa do Corpus Christi e A Rapa das Bestas de Sabucedo.
Por E.P. | PONTEVEDRA | 13/06/2022 | Actualizada ás 18:16
A Deputación de Pontevedra concedeu subvencións por valor de 72.000 euros ás dez festas declaradas de interese turístico da provincia e levará a cabo diversas actividades promocionais relacionadas con estas celebracións.
En concreto, achegará 48.000 euros ás seis festas de interese turístico internacional: a Arribada de Baiona, a Feira do Cocido de Lalín, o Corpus de Ponteareas, a rapa das Bestas de Sabucedo, a Festa do Viño de Cambados e a Romaría Viquinga de Catoira. Cada unha recibe 8.000 euros.
Outros 24.000 euros --6.000 euros para cada unha-- irán destinados ao catro festas de interese turístico nacional da provincia: a Lamprea de Arbo, a Reconquista de Vigo, a Festa da Auga de Vilagarcía e a do Marisco do Grove.
Ademais, a institución provincial anunciou que porá en marcha dous proxectos que "crearán produto" ao redor da Festa do Corpus Christi, de Ponteareas, e A Rapa das Bestas de Sabucedo, da man dos Plans de Sotibilidade Turística no Destino, que foron concedidos para as comarcas de Deza-Tabeirós-Montes e do Condado-Paradanta ao amparo do Plan de Recuperación, Transformación e Resiliencia do Goberno de España.
Segundo detallou a Deputación nunha nota de prensa, no Condado-Paradanta realizarase un museo ao aire libre dedicado á Festa do Corpus Christi, coa creación de elementos de divulgación e a creación de experiencias dixitais para a posta en valor deste patrimonio inmaterial.
No caso da Rapa das Bestas, levarase a cabo a "renaturalización" do 'Campo do Medio' para "recuperar os valores ecolóxicos da contorna, na instalación dun miradoiro na zona de pasto e na creación de experiencias inmersivas a través dun sistema de realidade aumentada.
Por outra banda, a Deputación realizará accións promocionais tanto das festas como dos destinos nos que teñan lugar a través de Turismo Rías Baixas e dos medios en liña, así como con accións de presentación e divulgación dos eventos.
