Galicia segue por baixo da media estatal no uso de Internet e dispositivos tecnolóxicos

A poboación galega apunta á velocidade da rede e o exceso de publicidade como principais problemas.

Por Europa Press / Redacción | SANTIAGO DE COMPOSTELA | 30/06/2022 | Actualizada ás 14:39

Comparte esta noticia

O número de dispositivos tecnolóxicos (computadores, tablets, consolas...), o acceso dunha conexión a Internet, as compras en liña, videochamadas ou a mensaxería instantánea incrementaron o seu consumo en Galicia durante 2021, aínda que segue por baixo da media española.

Así o recolle o estudo 'Cultura e tecnoloxías da información e comunicación 2022', do Observatorio da Cultura Galega (OCG). Este traballo indica que un 78,7% dos fogares galegos contan con algún computador (a media do Estado é do 83,7%); un 93,3% dispoñen de conexión a Internet (95,4% no Estado) e un 52,3% da cidadanía galega realizarou algunha compra en liña o pasado ano (o 56,1% en España).

Doutra banda, a través dunha enquisa da Asociación para a Investigación de Medios de Comunicación (AIMC), o OCG destacou que o 44,7% de usuarios de Galicia empregan o teléfono móbil como principal dispositivo de acceso á rede. Os seguintes son os computadores de sobremesa (27,2%) e os portátiles (23,4%).

Pola súa banda, o estudo referenciou os problemas máis recorrentes que atopa a poboación de Galicia no espectro tecnolóxico. Entre as deficiencias comúns destaca o exceso de publicidade, a velocidade da rede, e a falta de seguridade, privacidade ou confidencialidade.

CONSUMO AUDIOVISUAL

O visionado de películas e series en 'streaming' resaltou como unha das actividades máis repetidas polas persoas. O método de consumo máis habitual foi a través de plataformas de subscrición --tales como Netflix--, co que contan un 66,7% dos fogares galegos. Tras iso, atópanse distintas canles de contidos gratuítos como Twitch, Youtube ou TikTok. Estas plataformas congregaron a un 27,5% de internautas que consumiron máis dunha hora a visualizar vídeos.

En canto a televisión e radio, estes medios utilízanse polas canles de difusión tradicional, mentres que a lectura de información é consumida preferentemente na rede. Aínda así, o 60% da poboación non prescinde do xornal en papel. Por último, as páxinas web máis visitadas polos internautas de Galicia foron as seguintes: lavozdegalicia.es; xunta.gal; farodevigo.es; meteogalicia.gal, e zara.com.

COMPRAS EN LIÑA

O estudo tamén ofreceu datos sobre as compras en Internet de produtos culturais. A adquisición máis común foron os dispositivos electrónicos, cun 55,7%. Esta cifra supera ao conxunto total de España, que se sitúa nun 47,7%. Posteriormente, as compras relacionadas co lecer, tempo libre e entradas a espectáculos ocuparon o segundo escalafón de produtos máis obtidos mediante a rede.

PREFERENCIA POLO GRATIS

Outra das tendencias que mostra o informe é a preferencia da cidadanía polas actividades gratuítas. Excepto series e películas, a tendencia maioritaria implica o consumo de balde de libros electrónicos, radio ou televisión.

Neste aspecto, destacou o consumo de lectura de noticias de actualidade, os podcast ou a descarga de música gratuíta. Ademais, popularizáronse os QR, tanto para descargar as cartas dos bares como para obter información ampliada.

Usuarios de teléfonos móbiles
Usuarios de teléfonos móbiles

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta