Canadá volve trasladar que non hai impedimento para que España envíe medios ao Pitanxo

Familias dos 21 falecidos do pesqueiro Villa de Pitanxo reuníronse este xoves por videoconferencia con autoridades de salvamento de Canadá, que volveron trasladar que España pode enviar, se o desexa, un buque ou un robot para baixar ao pecio, xa que se atopa en augas internacionais.

Diso informou a portavoz dos familiares, María José de Pazo, tras participar en Madrid, na embaixada de Canadá en España, nun encontro de dúas horas e media do que fai unha valoración "moi positiva". Explica que "hai moitos precedentes" de países que enviaron medios como os que reclaman as familias.

Nesta reunión, na que participou o xefe coordinador do operativo de rescate, explicouse a secuencia do naufraxio. Os familiares alí presentes e desde as súas casas puideron formular preguntas. Agora, as autoridades canadense deixaron aberta a posibilidade aos familiares de manter futuras reunións ou demandar máis información. "Oxalá o Goberno español nos dese este trato", afirmou De Pazo.

Por outra banda, a Fiscalía da Audiencia Nacional sostén que a competencia para investigar o naufraxio do pesqueiro 'Villa de Pitanxo', afundido o 15 de febreiro a 450 quilómetros da costa de Terranova, é dos xulgados de Vigo por ser o porto da cidade desde o que partiu o barco o pasado 26 de xaneiro.

Reunión de familiares da Vila de Pitanxo con autoridades canadenses. FAMILIARES DA VILA DE PITANXO | Fonte: Europa Press