Pontevedra busca ser unha cidade libre de hepatite C en 2024

Os profesionais do Complexo Hospitalario Universitario de Pontevedra (CHUP) veñen traballando en proxectos pioneiros para eliminar a infección por hepatite C tanto en poboación xeral como nos colectivos máis vulnerables, usuarios de drogas e poboación en risco de exclusión social na capital provincial, que busca ser unha urbe libre desta doenza no ano 2024.

O Servizo de Dixestivo do CHUP foi premiado durante dous anos consecutivos (2020 e 2021) co galardón Best In Class (BIC) que recoñeceu, entre outras iniciativas, o uso de intelixencia artificial e big data para identificar pacientes con hepatites C.

Agora, coa aprobación da adhesión a #hepCityFree, que lidera a Alianza para Eliminación das Hepatites Víricas en España, AEHVE, a cidade dá un paso máis no obxectivo eliminar esta infección viral crónica para a que non existe vacina.

Grazas ao consenso de todos os grupos políticos con representación, Pontevedra súmase ás cidades de Sevilla, Valencia, Santander, Xixón, Granada, Vigo, Santiago de Compostela, Ferrol ou Madrid no obxectivo de acelerar a eliminación da hepatite C de acordo cos obxectivos marcados pola OMS para os países desenvolvidos. Esta adhesión converte Galicia na Comunidade Autónoma con máis cidades sumadas a este movemento.