Por Europa Press / Redacción | A Coruña | 19/07/2022 | Actualizada ás 20:08
A Audiencia Provincial da Coruña revogou, tras estimar un recurso presentado polos afectados, a sentenza que ditou en febreiro de 2021 o Xulgado de Instrución número 4 da Coruña na que condenaba a pagar unha multa de 180 euros a cada unha das oito persoas que subiron a través dunha escaleira ao balcón da Casa Cornide, propiedade do Franco, en setembro de 2017, durante unha protesta.
O xuíz, consideraba os oito dos '9 de Cornide', activistas vinculados ao BNG, autores dun delito leve de coaccións e absolvía un dos acusados ao considerar que non se acreditaba que accedese á vivenda. Os condenados, segundo a sentenza, permaneceron uns 50 minutos no balcón desde que foron requiridos por un axente da Policía Nacional para que baixasen. Entendía, así mesmo, que os condenados utilizaron durante a reivindicación "medios indebidos e limitantes, cando non directamente ofensivos, dos lexítimos dereitos de terceiros".
E dos nove xulgados, só absolvía a un que na vista declarou que non se subiu ao balcón e que se limitou a axudar aos demais a baixar cando apareceu unha escaleira. Todos eles situaron a protesta dese día nunha "acción simbólica" fronte a un "espolio", sostiveron ao reclamar a devolución ao patrimonio público do inmoble.
Agora, o fallo xudicial da Audiencia, con data de 15 de xullo de 2022, decreta a libre absolución de todos eles. O fallo incide na liberdade de expresión e no carácter simbólico da actuación.
"Orgullosos" da acción, os '9 de Cornide' trasladaron a súa "satisfacción" por este fallo xudicial que considera que lles dá razón cando, no seu día, defenderon que a acción foi "un acto de libre expresión fronte á inxustiza que supón que os Franco sigan ostentando a propiedade deste ben, que debe ser público".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.