A Xunta espera que o Goberno aprobe axudas para os afectados polos incendios

O vicepresidente segundo e conselleiro de Presidencia, Xustiza e Deportes, Diego Calvo asegurou este martes que espera que o Goberno central colabore coas persoas afectadas polos incendios que se produciron en Galicia este mes de xullo, "como fixo a Xunta a pasada semana", coa aprobación de axudas para estas zonas.

Neste sentido, Calvo puxo en valor o decreto aprobado a semana pasada no Consello da Xunta polo que se habilita a diversas consellerías a porse a traballar nas distintas convocatorias co fin de prestar axuda "o máis rapidamente posible" ás persoas que sufriron a vaga de incendios, co foco en quen viron destruídas ou moi danadas as súas vivendas.

En concreto, a Administración autonómica anunciou que achegará axudas de ata 122.400 euros a donos de vivendas afectadas polos incendios.

Por outra banda, en declaracións aos medios este martes, o vicepresidente segundo sinalou que os incendios se produciron en "circunstancias moi especiais", con orixe nas treboadas da noite do xoves 14 de xullo e "en plena onda de calor".

Así mesmo, recoñeceu o traballo de todas as persoas e grupos que participaron na extinción de incendios: o dispositivo da Consellería do Medio Rural, a Policía Autonómica, a Garda Civil, a UME, as dotacións de bombeiros dos parques das cidades, así como os dos consorcios provinciais e os voluntarios de Protección Civil.

Neste sentido, sinalou que foi "un esforzo moi grande" cunhas circunstancias "novas" que espera que non se repitan no que resta de ano. En todo caso, asegurou que "cada vez que hai un incendio tamén se aprende porque todos son distintos". "É moi difícil sufocar un incendio con 38 graos e despois de varios anos nos que tivemos boa sorte e non houbo incendios, polo que agora había moito material combustible nos montes", puntualizou o vicepresidente segundo.

ZONA CATASTRÓFICA

Doutra banda, o deputado do PP no Congreso Jaime de Olano informou de que os populares presentaron diversas iniciativas para reclamar ao Goberno central que declare zona catastrófica os municipios afectados polos incendios forestais dos últimos días en Galicia.

Así, demanda medidas concretas para axudar a familias, empresas e municipios. "O máis importante é asegurar as vidas das persoas afectadas e despois valorar os danos causados en materia de vivendas, negocios, gandaría, agricultura", apunta. 

Neste sentido, os populares instan o presidente do Goberno, Pedro Sánchez, a seguir o modelo da Xunta e que habilite axudas a particulares e autónomos que sufriron perdas a consecuencia dos lumes.