A Xunta mantén o seu "compromiso" coas ONGD en Galicia ata 2026, cun investimento anual de 100.000 euros
Por E.P. | SANTIAGO DE COMPOSTELA | 01/08/2022 | Actualizada ás 14:01
O vicepresidente segundo da Xunta e conselleiro de Presidencia, Xustiza e Deportes, Diego Calvo, incidiu no "compromiso" da Xunta coa Coordinadora Galega de Organizacións non Gobernamentais para o Desenvolvemento (ONGD) e garantiu que o Goberno de Galicia manterá o convenio anual de 100.000 euros ata o ano 2026.
Así o sinalou Calvo ante os medios de comunicación momentos previos á súa reunión con representantes da Coordinadora Galega de ONGD na sede central da Xunta, en Santiago. Xunto ao vicepresidente, tamén asistiu o director xeral de Relacións Exteriores e coa Unión Europea, Jesús Gamallo.
Durante a intervención, Calvo destacou o labor das ONGD en Galicia con "o seu traballo nos países máis desfavorecidos e que contan con menos recursos". Ademais, sinalou que o investimento da Xunta servirá para "mellorar as súas capacidades e orientar estratexicamente as súas actuacións".
