O PP considera que o Goberno "ocultou información" no atraso dos trens Avril
Piden a comparecencia da Ministra de Transportes para aclarar por que se incumpriron "compromisos firmes".
Por E.P. | SANTIAGO DE COMPOSTELA | 06/08/2022 | Actualizada ás 13:15
O deputado do PP no Congreso Celso Delgado reitera a solicitude de comparecencia "urxente e necesaria" da ministra de Transportes, Mobilidade e Axenda Urbana, Raquel Sánchez, tras coñecer a versión de Talgo sobre o atraso da entrega dos trens Avril en Galicia.
E é que esta mesma semana o presidente desta compañía, Carlos Palacio, remitía unha carta ao seu homólogo en Renfe, Isaías Táboas, na que rexeita a reclamación de 116 millóns de euros que lle solicita polo atraso nestes 15 trens de alta velocidade e acusa directamente á empresa pública.
Para Delgado, deputado por Ourense, esta resposta de Talgo fai "aínda máis necesarias" as explicacións que o PP solicitou o pasado 27 de xullo coa comparecencia de Raquel Sánchez e do propio presidente de Renfe. "Queremos que ambos dean explicacións veraces do ocorrido, das accións que se van a exercitar para esixir responsabilidades e de cal é o prazo exacto no que os trens Avril estarán a prestar servizos comerciais na nosa rede ferroviaria", explica nun comunicado o deputado no Congreso.
De acordo co PP, da carta do presidente de Talgo despréndese que houbo "compromisos firmes" por parte do Ministerio que logo foron incumpridos: "Ocultouse información ao Congreso, aos gobernos autonómicos e aos medios de comunicación. Creáronse expectativas aos usuarios do ferrocarril e aos sectores turístico e empresarial que non se cumpriron".
Neste contexto, Delgado lamenta que o Estado fornecese información aos deputados e á Xunta con datas que foron "sistematicamente incumpridas". "Galicia precisa urxentemente trens de ancho variable e de máis capacidade, pero Sánchez xa perdeu a oportunidade de achegalos neste dobre Ano Xacobeo. En realidade, xa non confiamos en ningún dos seus prazos", conclúe o popular.
