Por Europa Press / Redacción | Ourense | 16/08/2022 | Actualizada ás 16:55
A Xunta presentou o cartel do Our Fest Xacobeo 2022, que contará con Primal Scream, Metronomy e Belle & Sebastian como principais actuacións. Esta primeira edición do festival celebrarase o 17 de setembro no recinto de Expourense, en Ourense.
Segundo sinalou o delegado da Xunta, Gabriel Alén, contar con bandas internacionais como estas "dá unha nova dimensión que promove diferentes músicas e achega público tamén de fóra de España". Pola súa banda, o vicepresidente primeiro da Deputación de Ourense, Rosendo Fernández, destacou a "importancia" de que Ourense forme parte do Xacobeo.
Ademais dos grupos internacionais mencionados, participarán outros grupos estranxeiros como The Big Moon, e propostas "punteiras" a nivel estatal como Julián Maeso Big Band, que ofrecerá un concerto especial neste formato.
Os asistentes poderán gozar durante unha xornada de cinco concertos que se prolongarán ata a noite, e no recinto disporán de barras e zona con diversas ofertas de restauración.
As entradas para o festival xa están á venda a través de www.ataquilla.com cun prezo especial de lanzamento de 30 euros máis gastos de xestión. Máis adiante pasarán a custar 40 euros máis os gastos de xestión.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.