Veciñanza de Eirís presenta alegacións ao 'Novo Chuac' que "leva por diante 22 vivendas"
Tamén afecta restos arqueolóxicos e parte do parque xunto coa lagoa, explica a asociación veciñal.
Por Europa Press / Redacción | A CORUÑA | 29/08/2022 | Actualizada ás 18:49
A Asociación Veciñal de Eirís presentou alegacións ao proxecto de interese autonómico (PIA) de ampliación do complexo hospitalario universitario da Coruña, o 'Novo Chuac', segundo informa.
Nun comunicado, afirman que "toda a cidadanía se verá afectada polas obras e polo peche do centro de especialidades do Ventorrillo, o Hospital Materno-Infantil, o Oncolóxico e de parte do Abente e Lago". Ademais, reprocha á Xunta estar "a cambiar o proxecto continuamente", tentando, engade, "xustificar o inxustificable en recentes cambios lexislativos que tampouco respectan".
"Deciden tramitar todo a través dun PIA, que pode aprobar a Xunta directamente sen contar co Concello da Coruña, aínda que pague unha parte". "Pero daquela parte dos viarios pretenden que se modifiquen nun pleno do concello, saltando o procedemento para 'axilizar'". Tamén argumentan que a administración autonómica "salta a normativa ambiental" mediante un procedemento "que acurta o proceso", sostén a entidade veciñal.
En relación ao proxecto e a edificación proxectada, rexéitao por "levar por diante como mínimo 22 vivendas, restos arqueolóxicos, a lagoa do parque de Eirís e gran parte do propio parque", engade.
