Galicia recibe 315 vacinas para as vexigas do mono, que se priorizan a contactos estreitos e prácticas de risco
Galicia conta con 109 casos de vexigas do mono dos 6.543 de todo o Estado.
Por E.P. | SANTIAGO DE COMPOSTELA | 01/09/2022 | Actualizada ás 11:36
Galicia recibiu ata o momento 315 vacinas contra as vexigas do mono das 12.400 Jynneos que chegaron a España e que se administran, segundo os criterios establecidos polo Goberno central, priorizando contactos estreitos de casos confirmados e persoas con prácticas de risco.
Segundo confirmaron fontes da consellería, Galicia adaptará a partir deste xoves, 1 de setembro, os seus criterios de vacinación contra esta doenza, en consonancia coas recomendacións do ministerio. O documento coas indicacións para estender esta vacinación colgarase na páxina web da Consellería de Sanidade.
A captación de persoas candidatas a esta vacinación será realizada polos equipos de medicina preventiva das diferentes áreas sanitarias, aínda que "sen menoscabo da colaboración doutras unidades asistenciais específicas", e a inoculación terá lugar nos centros hospitalarios.
A vacina priorizarase para contactos estreitos de casos --entre o cuarto e o décimo cuarto día tras o contacto-- e para persoas con prácticas de risco que non estivesen expostas. Actualmente, Galicia conta con 109 casos de vexigas do mono dos 6.543 de todo o Estado.
