Xa podes viaxar gratis en Galicia por tren

Os descontos e abonos gratuítos aprobados polo Goberno para todo o transporte público do país comezarán a aplicarse este xoves 1 de setembro, co obxectivo de suavizar o impacto que a inflación está a ocasionar nos cidadáns.

En concreto, os viaxeiros habituais dos servizos de proximidade e Media Distancia convencional viaxarán gratis, mentres que os usuarios frecuentes dos Avant e algúns servizos AVE terán un 50% de desconto, ao que se suma a rebaixa mínima do 30% nos abonos e títulos multiviaxe de cada cidade, que as comunidades puideron ampliar ao 50%.

Para o primeiro caso, os clientes terán que adquirir o novo abono que creou Renfe especificamente para aplicar esta medida ata o 31 de decembro. Cobrarase unha fianza de 10 euros para as Proximidades e de 20 euros para a Media Distancia, que se devolverá a condición de que se realicen polo menos 16 viaxes.

Nas Proximidades o abono será válido para toda a rede que conforme cada núcleo, polo que viaxando máis de 16 veces nestes catro meses, será completamente gratuíto. No caso da Media Distancia, o abono terá unha orixe e un destino fixado polo viaxeiro, polo que se terá que viaxar 16 veces entre esas dúas estacións para que sexa gratis, sempre unha única persoa.

En canto aos Avant, que son Media Distancia pero de Alta Velocidade, aplicarase un desconto do 50% aos actuais abonos que xa se comercializan. Tamén se creou un novo abono para determinados AVE de menos de 100 minutos de traxecto, principalmente en Castela e León, cun 50% de desconto.

Só as rutas de AVE entre Madrid-Palencia, Madrid-Zamora, León Valladolid, Burgos-Madrid, León-Palencia, Burgos-Valladolid, Ourense-Zamora, Palencia-Valladolid, Huesca-Zaragoza, León-Segovia, Segovia-Zamora, Palencia-Segovia e Medina del Campo-Zamora terán este desconto, só en Castela e León, Aragón e Madrid.

DESCONTOS DA XUNTA

Por outra banda, a bonificación do 50% do billete nos bonos multiviaxe de autobús interurbano, o transporte na ría de Vigo e o tren de proximidade na área de Ferrol tamén entrou en vigor este xoves, 1 de setembro, e prolongarase ata o 31 de decembro.

Este xoves, o Diario Oficial de Galicia (DOG) publicou a orde pola que se regula esta rebaixa, despois de que o pasado mércores o presidente da Xunta, Alfonso Rueda, anunciase estes descontos que se aplicarán ás viaxes coa Tarxeta de Mobilidade de Galicia e a Tarxeta Xente Nova, incluídos aqueles bonos xa adquiridos con anterioridade.