A Xunta confirma que non houbo arrastre de cinzas tras os lumes no Barbanza nin afectación a bancos marisqueiros

O conselleiro do Medio Rural, José González, mantivo este venres un encontro cos responsables das diversas comunidades de montes da comarca do Barbanza, na que indicou que non houbo arrastre de cinzas nin afectación a bancos marisqueiros tras os lumes rexistrados este verán na zona.

Na reunión, na que se avaliou a situación tras os incendios forestais e as medidas tomadas ata a data, os expertos explicaron que a afectación nos chans foi en xeral "baixa" e só "moderada" en puntos concretos, nos que levarán a cabo medidas paliativas de recuperación para evitar a erosión. En concreto, procederase á técnica de acolchado de palla nas zonas máis afectadas.

Durante a reunión, o titular de Medio Rural informou de que a semana pasada os propios técnicos do Centro de Investigación Forestal de Lourizán desprazáronse á zona para comprobar que non houbese arrastre de cinzas, despois das fortes choivas rexistradas.

Nesas inspeccións, segundo indicou González, confirmouse que non houbo afectación a bancos marisqueiros e que a turbidez da auga non tiña nada que ver co incendio rexistrado no mes de agosto en Boiro, senón con sedimentos depositados nos fondos dos ríos e dos camiños, antes do lume no Barbanza.

O conselleiro reivindicou que a Xunta xa se adiantou a estes posibles arrastres e fixera traballos nas áreas afectadas polo lume.

No encontro tamén se falou das medidas a adoptar no medio e longo prazo, para o que José González pediu colaboración das comunidades de montes co fin de procurar un territorio "o máis resiliente" posible fronte ao lume.