Por Europa Press / Redacción | Vigo | 29/09/2022 | Actualizada ás 15:43
O presidente do Partido Popular, Alberto Núñez Feijóo, pediu este xoves ao Goberno central que recorra ante Bruxelas o veto á pesca de fondo en 87 caladoiros do Océano Atlántico e que solicite medidas cautelares para que non entre en vigor esta normativa o próximo 9 de outubro. Así o sinalou o líder 'popular' en Vigo tras reunirse con representantes da Confederación Española de Pesca (Cepesca), onde criticou esta medida por ser, ao seu xuízo, "equivocada, precipitada e fóra de contexto".
Neste sentido, cargou contra o comisario europeo de Medio Ambiente, Océanos e Pesca, Virginijus Sinkevicius, por tomar unha decisión "irresponsable" que aumentará o prezo do peixe nun momento no que Europa vive unha "tensión inflacionista".
Ademais, Feijóo asegurou que este veto suporá o amarre de "moitísimos barcos", xa que uns 1.100 buques se verán afectados, do mesmo xeito que máis de 4.000 tripulantes, por culpa dunha normativa "precipitada, non consensuada e non sólida desde o punto de vista científico".
O presidente do PP insistiu en que este novo regulamento é "inxusto" e "pouco transparente" xa que impedirá a pesca en ata 87 caladoiros do Atlántico, afectando así á "soberanía alimentaria de Europa", o que obrigará a importar peixe desde outros continentes onde non se aplican estas normas.
Tamén lamentou a afectación económica e social que ten "este conflito gratuíto" creado polas administracións nun momento de "inflación e de crise" en Europa e no que o sector pesqueiro vén de vivir unha pandemia e un aumento dos prezos do combustible.
Con todo, lembrou as declaracións do comisario de pesca, que asegurou que o Goberno español mandou as súas alegacións ao regulamento fóra de prazo, polo que non se tiveron en conta. "Se isto é así, é dunha gravidade inaudita. Sendo o país máis afectado, que se presenten as alegacións tarde é especialmente grave", apostilou Núñez Feijóo.
RUEDA
Tamén o presidente da Xunta, Alfonso Rueda, urxiu ao Goberno estatal que presente "canto antes" o recurso ante o Tribunal de Xustiza da Unión Europea (TXUE) para tratar de frear a entrada en vigor o 9 de outubro do regulamento.
Rueda insistiu en que é "urxente" coñecer se o Executivo central, que é quen "ten lexitimación directa" para iso, vai levar este asunto ao tribunal comunitario. "Van pasando os días e é moi preocupante", engadiu.
O titular da Xunta entende "que si" vai haber ese recurso, porque "o contrario sería moi difícil, por non dicir imposible, de entender". No caso de que non o fixese, volveu prometer que sería o Executivo galego quen o presentase.
"Espero que se presente o recurso, que se anuncie canto antes e o Goberno de España dispoña de todos nós para facer máis forza ante as institucións europeas. E, se iso non é así, presentariamos o recurso desde a Xunta e buscariamos interlocución directa desde a Xunta, pero o normal e lóxico sería facelo a través do Goberno do noso país", resumiu.
BNG
A eurodeputada do BNG Ana Miranda denunciou este xoves na Comisión de Pesca do Parlamento Europeo as consecuencias "inadmisibles" do veto á pesca de fondo en 87 caladoiros do Atlántico adoptado pola Comisión Europea.
"Lamento ter que comezar o meu traballo na Comisión de Pesca rexeitando a decisión unilateral tomada o pasado 15 de setembro", manifestou Ana Miranda nunha intervención na que destacou que para o sector pesqueiro galego trátase dunha medida "inaceptable", ao ser adoptada "sen ter en conta o criterio socioeconómico".
"De verdade que non coñece a Comisión as graves consecuencias que ten esta decisión para o sector pesqueiro galego", expuxo Ana Miranda, quen apuntou que a pesca en Galicia supón case o 6% do PIB e que esta medida afecta 200 barcos de capital galego e 900 de forma indirecta, con máis de 4.000 tripulantes afectados.
Tamén situou o impacto económico en case 900 millóns de euros, sendo os portos de Vigo, Ribeira, A Coruña e Celeiro os máis afectados, así como toda a cadea pesqueira.
A eurodeputada cualificou de "inadmisible" que non se debata a decisión e que se adoptou "sen utilizar un criterio científico actualizado". Tamén pediu "escoitar" o sector.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.