Por E.P. | Santiago de Compostela | 28/10/2022 | Actualizada ás 18:20
O presidente da Xunta, Alfonso Rueda, comprometeuse a sufragar durante os próximos catro anos o 70% do custo das obras de saneamento que se realicen nos núcleos rurais de Ferrol, cuxo alcalde, Ángel Mato, reclamou unha unidade da Policía Autonómica para a cidade, a única das sete grandes galegas que carece dela.
Rueda e Mato pecharon este venres a rolda de encontros do titular do Goberno galego cos rexedores das sete principais cidades galegas, na que, con todo, faltou a reunión co rexedor de Vigo, Abel Caballero, que declinou recibir o presidente aducindo as condicións impostas por San Caetano.
Así as cousas, o presidente e o alcalde ferrolán cualificaron de "cordial" o encontro mantido este venres no edificio administrativo da Xunta, que se estendeu durante dúas horas e no que tamén estivo presente a delegada da Xunta en Ferrol, Martina Aneiros.
Ao termo da reunión, Mato e Rueda avanzaron que a Xunta se comprometeu a sufragar no próximo catro anos ata un 70% do custo das obras de saneamento nas parroquias da zona rural de Ferrol.
Segundo explicou Rueda, o 30% restante corresponderá ao concello, "reservando 1,8 millóns en 2023 para a obra que indiquen" e co obxectivo de iniciar estes traballos "de inmediato".
INSTALACIÓNS DEPORTIVAS E POLICÍA
Outro dos acordos alcanzados é que a Xunta asumirá unha terceira parte da reparación de instalacións deportivas. "O concello proporá un plan xeral e uno vez coñecido, achegaremos esa parte", detallou Rueda.
Pola súa banda, o rexedor de Ferrol solicitou unha unidade da Policía Autonómica nesta cidade, a única de Galicia que non conta con ela. Ante a petición, Rueda trasladou que "actualmente existen unhas vacantes dun 25% na cobertura de prazas na policía adscrita a Galicia, algo que, "depende do Ministerio do Interior". En todo caso, comprometeuse a estudar a petición.
No ámbito xudicial, o alcalde de Ferrol expuxo a construción no futuro dun novo edificio en terreos do antigo cuartel Sánchez Aguilera, ao que Rueda apuntou que a Administración autonómica estudará "a posibilidade de cesión de parcelas ou aproveitamento de edificios xa existentes". "Pero isto é algo que non é a curto prazo, pero si se pode ter estudado de face ao futuro", apostilou o presidente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.