Xornadas de improvisación no Teatro Principal de Santiago para crear unha obra sobre Fraga
A plataforma ButacaZero lanzará en 2023 esta peza titulada 'Iribarne', que non será un biopic, senón unha investigación sobre a figura do político
Por Europa Press / Redacción | SANTIAGO DE COMPOSTELA | 21/11/2022 | Actualizada ás 19:26
O Teatro Principal de Santiago de Compostela desenvolverá entre este martes e este xoves, coincidindo co centenario do nacemento do expresidente da Xunta Manuel Fraga, unhas xornadas de traballo creativo e improvisación teatral no marco da creación da nova proposta escénica da plataforma ButacaZero para 2023: 'Iribarne'.
Os dous directores da peza, Esther F. Carrodeguas e Xavier Castiñeira, profundarán con ela na figura de Fraga, como unha forma de que o público comprenda o impacto desta personalidade en "o noso presente e identidade".
O centenario do nacemento do "popularísimo" político servirá como pretexto para estas tres xornadas de creación con cinco intérpretes e a colaboración da directora Agurtzane Intxauraga, da compañía vasca Hika Teatroka.
Este intercambio artístico ten lugar grazas ao programa 'Cruces', cuxo obxectivo é favorecer a que diferentes compañías de diferentes autonomías do norte do país poidan coñecerse creativamente e trazar lazos de unión.
'Iribarne' non será un biopic sobre a vida de Manuel Fraga, senón unha investigación sobre a súa figura e percorrido político para determinar a influencia que tivo, e "pode seguir tendo", na vida dos galegos.
En palabras dos directores, esta personalidade "particularísima e popularísima" que podería "suceder a outro galego, Francisco Franco", tívose que "conformar" con ser o "grandísimo presidente de todos os galegos e galegas". Afirman que por mor deste desenlace deseñou non só o que é agora mesmo Galicia, senón que tamén o denominan a "orixe da España do turismo, do destape e dos paradores".
ButacaZero levantará o proxecto 'Iribarne' en confluencia co público, que poderá estar presente durante os dous primeiros días do proceso creativo no teatro compostelán, cun aforamento de 50 persoas. As persoas interesadas poden apuntarse no correo iribarnes@butacazero.net, indicando cal dos dous días queren participar.
Esta plataforma, posta en marcha polo tándem formado por Esther F. Carrodeguas e Xavier Castiñeira, é actualmente un proxecto "de referencia" no panorama escénico galego. Caracterizados por facer teatro contemporáneo cunha mirada "crítica e irónica", tentarán na súa nova iniciativa achegarse ao público dunha forma diferente.
Nos próximos meses terán lugar numerosos eventos, como entrevistas e novas sesións creativas multidisciplinares ou de improvisacións dramatúrgicas das cales nacerá 'Iribarne', a cal se estreará en 2023.
