Suposta "prevaricación" nos trámites de dous parques eólicos de Greenalia, segundo Adega

A Asociación para a Defensa Ecolóxica de Galicia (Adega) presentou unha denuncia ante a Fiscalía de Medio Ambiente da Coruña contra a Xunta, por presunta prevaricación e malversación de fondos vinculados coa tramitación do plan industrial para o desenvolvemento de dous proxectos eólicos de Greenalia Wind Power.

Segundo explicaron representantes de Adega nunha rolda de prensa, Kaekias Eólica S.A. conseguiu, na Orde do 29 de marzo de 2010, a asignación de 75MW para desenvolver os parques eólicos de Campelo e Lamas de Feás co compromiso de executar un plan industrial específico, ou de monetizalo nun importe económico que tería que ser depositado no fondo capital-risco do Instituto Galego de Promoción Económica (IGAPE).

Adega sinalou no seu relato, que Kaekias Eólica escolleu a opción de monetizar os parques industriais por un valor de 11.721.971 euros. Así, en 2016 o Grupo Greenalia absorbeu a empresa Kaekias Eólica e a titularidade dos proxectos eólicos Campelo e Lamas de Feás, así como os compromisos vinculados a ambos os proxectos, que non se levaron a cabo.

Deste xeito, Greenalia solicitou en 2019 que se dese por executado o plan industrial en base ao desenvolvemento de tres das súas actividades levadas a cabo entre 2015 e 2019, no canto de ingresar os case 12 millóns de euros.

Adega sinalou que os feitos denunciados están relacionados coa resolución administrativa emitida o 21 de xullo de 2021 pola Dirección Xeral de Planificación Enerxética e Recursos Naturais na que se dá por executado o plan industrial que comprometía a asignación de potencia para os parques eólicos no concurso da Xunta de 2010.

Así, Adega puxo o foco durante a rolda de prensa, na anterior directora xeral de Planificación Enerxética e Recursos Naturais e actual secretaria xeral de Industria, Paula Uría Traba, por estar á fronte da dirección cando se deu por executado o plan industrial de Greenalia.

Os representantes de Adega sinalaron que a regulación do concurso de 2010 "non tiña cabida legal unha modificación do proxecto industrial". Así, insistiron en que "é especialmente grave que o proxecto se dese por executado" e que isto "crea un perigoso precedente".

GREENALIA AFIRMA "CUMPRIR CON TODOS OS CRITERIOS"

Consultada por Europa Press, Greenalia defendeu "cumprir con todo os criterios que lle pediu a administración e xustificar todo en tempo e forma".

Así mesmo, indicou que "chama a atención que Adega reclame o cumprimento de plans industriais, que, como neste caso, a pesar de non estar construídos os parques, xa se executou todo o investimento e acreditouse de forma fidedigna".

Ademais, Greenalia convidou Adega "a sentar para deseñar unha estratexia" co fin "de construír un país máis competitivo e sustentable para o beneficio de todos". Así, subliñou que ambas as entidades "perseguen o mesmo obxectivo, o desenvolvemento de Galicia".

Parque eólico de Greenalia en Miñón | Fonte: Greenalia