En 2023 crearanse 60 novas prazas de enfermaría en Atención Primaria
Por Europa Press / Redacción | LUGO | 28/11/2022 | Actualizada ás 17:03
O conselleiro de Sanidade, Julio García Comesaña, anunciou que os orzamentos do seu departamento contemplan a creación en 2023 de 60 prazas de enfermaría en Atención Primaria.
Así o destacou durante a súa participación este luns na homenaxe a Elvira López Mourín, enfermeira nada en Láncara a finais do século XIX que se converteu na primeira da aviación militar, segundo recolle un comunicado da Consellería de Sanidade.
Durante o acto, ao que asistiu tamén o presidente da Academia de Enfermaría de Galicia, Isidoro Rodríguez Pérez, e a presidenta do Colexio de Enfermaría de Lugo, Lourdes Bermello López; o titular de Sanidade enxalzou a figura da homenaxeada, unha muller "que rompeu todas as barreiras".
Elvira López Mourín conseguiu entrar na Escola da Cruz Vermella Española, onde alcanzou o fito de pertencer á primeira promoción de enfermeiras profesionais en 1921, ademais de ser a primeira enfermeira en participar nun voo militar en España.
"Abriu o camiño para a profesión de enfermaría pero, sobre todo, para as mulleres da súa época", incidiu García Comesaña, que subliñou a importancia do traballo que desempeñan as profesionais da enfermaría algo que, di, queda patente en cada campaña de vacinación.
"Cremos que a enfermaría ten que xogar un papel crave na mellora e perfeccionamento do Sergas", apuntou o conselleiro.
