Mar estuda recorrer á figura do práctico substituto para cubrir a ausencia nos portos de Costa da Morte

A conselleira do Mar, Rosa Quintana, garantiu este venres no pleno da Cámara galega que o seu departamento traballa para proporcionar o "mellor servizo de pilotaxe posible" para cubrir a ausencia deste posto en portos da Costa da Morte. Sobre a mesa está recorrer a figura do práctico substituto.

A xubilación do actual encargado da ría de Corcubión, que alberga ata tres portos e a ausencia de candidatos para substituílo nos últimos concursos convocados deixou a zona sen un práctico desde este xoves.

A pesar de que non esperan recibir barcos durante este mes de decembro, o Colexio oficial Nacional de Prácticos de Porto alertou do risco que supón non ter esta figura para afrontar posibles avarías ou accidentes de barcos que necesiten atracar. Ademais, recalcaron que a Costa da Morte é unha zona "propensa a ter sinistros".

Segundo comunicou Rosa Quintana sobre a mesa está un prego que contempla a fórmula do práctico substituto, que permitiría cubrir o servizo, posto que a pesar de que a embarcación ten que estar no porto para dar apoio aos barcos, non é necesario que estean os medios humanos na propia dársena.

Nesta liña, o prego garantiría o servizo ao comunicar con antelación ao práctico da chegada dos buques aos portos. Isto facilitaría a planificación da actividade do traballador nos distintos portos.

Quintana respondeu preguntada polo BNG, que a través do deputado Daniel Pérez, esixiu a recuperación do servizo pleno nos portos de Cee, Corme e Laxe.

"IRRESPONSABILIDADE E INTENCIONALIDADE"

Neste contexto, na mesma xornada na que dentro da Cámara abordábase esta cuestión, representantes de XEAL e de CIG de Cee concentráronse a reclamado "responsabilidade política" ao Goberno galego, ao que urxiron unha solución.

Así mesmo, o secretario da Unión Local da CIG de Cee, Xabier Santos, trasladou que levan denunciando esta situación desde maio, porque sabían que o actual práctico se xubilaría nestas datas.

Tamén, engadiu que a Xunta recortou no 50% as prestacións a este servizo que "con esta cantidade económica non se pode prestar" e non tentou negociar coa única persoa habilitada para o cargo.

O representante da CIG de Cee denunciou a "irresponsabilidade e a intencionalidade" da decisión do Goberno e afirmou que non entende como 20 anos despois do accidente do Prestige "pon máis en perigo a ría".

Por outra banda, o presidente do comité de empresa de XEAL, Alfonso Mouzo, trasladou as consecuencias que ten esta situación para XEAL, debido a que a súa distribución é principalmente por vía marítima, exceptuando algúns casos como Portugal. Así mesmo, comunicou que o cliente máis próximo en España está en Alxeciras, (Cádiz) e ao non ter práctico non pode atracar ningún buque no porto de Brens.