Nove falecidos por Covid na primeira semana de decembro en Galicia
Vigo, con cen máis casos máis que o luns, e Santiago son as dúas únicas áreas sanitarias na que se incrementan os positivos.
Por Europa Press / Redacción | SANTIAGO DE COMPOSTELA | 07/12/2022 | Actualizada ás 12:22
Galicia notificou outros seis falecidos por coronavirus nos últimos días, o que eleva a nove as persoas que morreron con esta infección no que vai de mes de decembro de 2022. No cómputo xeral, Galicia alcanzou os 3.981 óbitos rexistrados desde o inicio da pandemia.
O Sergas informou este mércores das últimas mortes rexistradas en Galicia, a primeira, o día 2 de decembro, un home de 94 anos da área sanitaria de Ferrol. Dese mesmo día, tamén se notificaron a morte dunha muller de 81 anos, da área sanitaria de Vigo; e a doutro home, de 92 anos, da de Ourense, Verín e O Barco de Valdeorras.
Correspondente ao día 3 de decembro, súmase a morte dun home de 82 anos, da área sanitaria de Ourense, Verín e Ou Barco; e a dunha muller de 90 anos da área sanitaria A Coruña e Cee. Do día 4 notificouse o falecemento dun home de 90 anos da área sanitaria de Vigo. Segundo informou a Consellería de Sanidade nun comunicado, todas as persoas que faleceron nas últimas horas tiñan patoloxías previas.
CASOS ACTIVOS
Actualmente, Galicia rexistra un total de 1.129 casos activos, o que supón sete máis que con respecto ao luns, despois de que se sumaron 79 casos ao cómputo nas últimas horas --o protocolo só recolle a obrigación de computar aos colectivos vulnerables--.
Con datos das 18,00 horas deste martes sobre a situación dos infectados, 137 están hospitalizados en unidades convencionais e seis atópanse nas unidades de coidados intensivos. En comparativa aos datos coñecidos o luns (correspondentes ás 18,00 horas do domingo), hai 19 hospitalizados menos.
