Por Europa Press / Redacción | SANTIAGO DE COMPOSTELA | 20/12/2022 | Actualizada ás 13:39
A Axencia de Doazón de Órganos e Sangue (ADOS) comunicou a recuperación das reservas de sangue de todos os grupos sanguíneos, polo que agradeceu a participación nas campañas a todas as persoas que acudiron a doar.
Durante as pasadas semanas, a ADOS fixo varios chamamentos xeneralizados á cidadanía para reverter as baixas reservas de sangue, que se rexistraron especialmente nos grupos A e 0 positivo.
Unha escaseza que, en tan só dous días, obrigou a aprazar case unha trintena de operacións non urxentes nos hospitais galegos, que o Servizo Galego de Saúde (Sergas) indicou no seu día que serían reprogramadas para axiña que como fose posible.
Este martes, ADOS lembrou a importancia de facer un "esforzo" durante estas datas, xa que os hospitais galegos necesitan entre 400 e 500 doazóns diarias de sangue para garantir o labor asistencial nos centros hospitalarios.
PROGRAMACIÓN PARA Os PRÓXIMOS DÍAS
Deste xeito, fixo pública a programación das unidades móbiles para os próximos días, co fin de facilitar que os galegos poidan acudir a doar. Así, os vehículos de asistencia estarán o mércores 21 de decembro en Miño, Os Rosales (A Coruña), Carral, Santa Comba, Praza Roxa (Santiago), Barro, Ponte Caldelas, Balaídos (Vigo), Redondela, Cervo, Mondoñedo, estación intermodal (Ourense).
Durante o xoves, poderase doar en Fene, Cambre, Oleiros, Melide, Pobra do Caramiñal, Cuntis, Porriño, García Barbón (Vigo), Paradela, Portomarín, Monforte, A Merca, Taboadela, estación de San Francisco (Ourense).
Con todo, o venres desprazaranse a Praza de España (Ferrol), Praza Conchiñas (A Coruña), Sada, Rianxo, Área Central (Santiago), A Estrada, Navia e Valadares (Vigo), Monforte, e O Carballiño.
Finalmente, o sábado os puntos estarán situados en Praza de España (Ferrol), Obelisco (A Coruña), Área Central (Santiago), Navia (Vigo), Rúa do Paseo (Ourense) Ademais, estarán habilitados os puntos de doazón existentes nos hospitais do sete grandes cidades galegas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.