Por Europa Press / Redacción | SANTIAGO DE COMPOSTELA | 04/01/2023 | Actualizada ás 14:31
A Xunta presentou alegacións contra a Lei de Familias do Goberno central porque entende que o texto "invade" competencias autonómicas e "afectará negativamente as familias numerosas e ás monoparentais.
Así figura nun escrito trasladado polo Goberno galego ao Executivo central no que, entre outras cuestións, pide que non desapareza a denominación de familia numerosa, segundo recolle un comunicado enviado aos medios este mércores.
Deste xeito, a Xunta censura que "entre a variada lista de familias que recolle a lei" non se inclúa a de familia numerosa, mentres que afea que a lei "limite o concepto" de familia monoparental.
Neste senso, asegura que as comunidades "xa regularon esta tipoloxía", polo que "se non se modifica" o borrador da lei, "centos de familias" perderán o título acreditativo que outorga a Xunta.
Outra das críticas é que "non" exista "ningún avance" en materia económica para a primeira etapa educativa dos nenos. "O Executivo central segue sen destinar un só euro a garantir a gratuidade das escolas infantís, medida pioneira da Xunta e que está a ter unha grande acollida entre as familias", engadiu a Consellería de Política Social nun comunicado.
Por último, acusa ao Goberno de "non contar" coa participación das comunidades para incorporar ideas a un texto normativo "que invade competencias autonómicas". Por todo iso, a Xunta demanda un encontro presencial do Consello territorial de Servizos Sociais para abordar a nova Lei de Familias.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.