Por Europa Press / Redacción | SANTIAGO DE COMPOSTELA | 17/01/2023 | Actualizada ás 10:11
O temporal de vento e choiva, que deixou este luns case 250 incidencias en Galicia, empeorará este martes coa caída prevista das temperaturas e o descenso da cota de neve ata situarse, conforme avance a xornada, en 300 metros.
Polo momento, o tráfico aéreo xa acusou os efectos do mal tempo e, segundo fontes de Aena consultadas por Europa Press, Air Europa cancelou dúas chegadas de Madrid, unha ao aeroporto de Peinador, en Vigo, e a outra a Alvedro, na Coruña.
Ambas as chegadas de Madrid estaban previstas para as 7,50 horas e, en consecuencia, ao non aterrar os avións, tamén se cancelaron as saídas correspondentes. Polo momento, o areopuerto de Santiago funciona con normalidade, aínda que dada a situación meteorolóxica Aena non descarta que máis voos se vexan afectados. En consecuencia, aconsella aos pasaxeiros en redes sociais comprobar a información relativa aos seus voos.
NEVADAS E ALERTA VERMELLA NA COSTA DA CORUÑA
De acordo coa previsión meteorolóxica, a situación non vai mellorar nas próximas horas. Así, este martes varias zonas da Comunidade --con especial intensidade os concellos de montaña das provincias de Lugo e Ourense, pero tamén outras zonas do interior-- estarán en alerta por neve.
A cota podería chegar a baixar a 300 metros, segundo as previsións dos organismos meteorolóxicos e espéranse acumulacións superiores a 20 centímetros en menos de 24 horas nas zonas de maior altitude.
Así mesmo, a costa da coruña permanecerá este martes en alerta vermella por un temporal que, segundo as predicións, deixará ondas de ata nove metros de altura. Por iso, a Dirección Xeral de Emerxencias e Interior da Vicepresidencia Segunda da Xunta acordou elevar ao grao máximo a alerta polos efectos do temporal costeiro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.